Sumqayıt Gənclər Evinin elan etdiyi VI könüllü müsabiqəsinə seçim keçirilib.

Xeberle.com-a verilən məlumata görə, müsabiqə çərçivəsində şəhər Gənclər və İdman Baş İdarəsinin dəstəyi ilə Gənclər Evində könüllülərin müsahibə mərhələsi keçirilib. Müsabiqənin məqsədi ölkə başçısının Sərəncamı ilə təsdiq edilmiş "Azərbaycan gəncliyi 2017-2021-ci illərdə Dövlət Proqramı”ndan irəli gələn məsələlərin icrası, gənclərin asudə vaxtlarının səmərəli təşkili, təşəbbüslərinin dəstəklənməsi və inkişaf etdirilməsinə şəraitin yaradılması, sosial fəaliyyətlərinin artırılması, bilik və yaradıcılıq potensiallarının üzə çıxarılması, könüllülük hərəkatına dəstək olmaqdır. Təşkilatı iş və müəllim köməkçisi olmaqla 2 istiqamət üzrə keçirilən müsabiqəyə 30 nəfərdən çox gənc müraciət edib. Gənclər Evində təşkil olunan müsahibə mərhələsindən uğurla keçən gənclər müvafiq istiqamətlər üzrə könüllülük fəaliyyətinə qəbul edilib.

Könüllülər əlavə olaraq Gənclər Evində keçirilən seminar,təlim,kompyuter kursları, ingilis və rus dillərində danışıq klublarında, intelektual oyunlar,tur gəzintiləri, bayram tədbirləri,flaşmoblara cəlb ediləcəklər. Könüllülük fəaliyyətinin sonunda isə iştirakçılara fəaliyyətlər üzrə "Könüllülük sertifikatı” təqdim ediləcəkdir. Qeyd edək ki artıq VI buraxılış təşkil olunan Könüllülük fəaliyyətində indiyə qədər 105 gənc iştirak edib.