Payız-qış mövsümünün başlaması Sumqayıtda bir sıra problemlər yaratmaqla yanaşı, qazın təzyiqinin aşağı düşməsi ilə də nəticələnib.
Xeberle.com-a şikayət edən sakinlər 6, 13-cü mikrorayonlarda, İnşaatçılar qəsəbəsində, 52-ci və 53-cü məhəllələrdə qaz təzyiqinin zəif olmasını bildiriblər.
Məsələ ilə bağlı Sumqayıt şəhər Qaz İstismar İdarəsinin baş mühəndisi Teymur Balıyevla əlaqə saxladıq. Baş mühəndis Xeberle.com-a bildirdi ki, bu problem yaxın müddətdə tam aradan qaldırılacaq:
"Havalar soyuduqca insanların qaza olan ehtiyacları artır. Bu səbəbdən də qazın təzyiqi aşağı düşə bilər. Hal-hazırda bu işləri tənzimləməyə çalışırıq. Məsələn, dünən 6-cı mikrorayondan şikayət var idi. İşçilərimiz oraya gedərək, qazın təzyiqini tənzimləyərək, problemi aradan qaldırdılar. Başqa ərazilərdən isə qazla bağlı bizə şikayət daxil olmayıb".
T.Balıyev problemlərin davamlı olaraq aradan qaldırıldığını və qış mövsümündə əhalinin problemsiz qazdan istifadə edə biləcəyini də sözlərinə əlavə edib.
Hicranə İsmayılova
Xeberle.com

Xəbərdən istifadə edərkən istinad etmək vacibdir.