Sumqayıt Dövlət Universitetində (SDU) Azərbaycan Xalq Cümhuriyyətinin yaradılmasının 100 illiyinə həsr olunmuş idman yarışının (şahmat, dama, nərd) qalibləri mükafatlandırılıb.
SDU-dan AZƏRTAC-a bildiriblər ki, fevralın 7-dən 14-dək davam edən yarışda universitet əməkdaşları ilə yanaşı, Sumqayıt Dövlət Texniki Kollecinin tələbələri də komanda və şəxsi birincilik üzrə bacarıqlarını nümayiş etdiriblər.
Mükafatlandırma mərasimini universitetin rektoru Elxan Hüseynov açaraq, Prezident İlham Əliyevin 2018-ci ilin "Azərbaycan Xalq Cümhuriyyəti İli” elan edilməsi ilə əlaqədar Sərəncamını yüksək qiymətləndirib. Bildirib ki, Xalq Cümhuriyyətinin yaranması xalqımızın dövlətçilik salnaməsinin parlaq səhifələrindən birini təşkil edib.
Elxan Hüseynov dövlətimizin başçısının məqsədyönlü siyasəti nəticəsində Azərbaycanın sürətli inkişafından, idmançılarımızın mötəbər turnirlərdə qazandıqları nailiyyətlərdən, ölkəmizin nüfuzlu beynəlxalq yarışlara ev sahibliyi etməsindən də danışıb. Qeyd edib ki, idmanın inkişafı Azərbaycanın dövlət siyasətinin prioritet istiqamətlərindəndir. Artıq dünya Azərbaycanı idman ölkəsi kimi tanıyır. İdmançılarımız Avropa Oyunlarında ikinci, İslam Həmrəyliyi Oyunlarında isə bütün müsəlman ölkələri arasında birinci yerə layiq görülüblər.
Rektor, həmçinin vurğulayıb ki, hazırda respublikamızın bütün bölgələrində idmanla məşğul olmaq üçün lazımi şərait var. O cümlədən Sumqayıt Dövlət Universitetində də tələbələrin asudə vaxtlarını səmərəli keçirməsi, gənclərin hərbi-vətənpərvərlik ruhunda tərbiyə edilməsi, idmanla müntəzəm məşğul olmaları üçün hərtərəfli şərait yaradılıb. SDU-nun idmançı tələbələri ölkəmizi və universiteti layiqincə təmsil edir, çox sayda medallar qazanırlar.
Sonra prorektor Ramiz Hüseynov yarışın nəticələrini elan edib. Qaliblərə fəxri fərman, kubok və qiymətli hədiyyələr təqdim olunub.
SDU-nun bir qrup əməkdaşı isə respublikada keçirilən mötəbər idman yarışlarında universiteti uğurla təmsil etdiklərinə görə qiymətli hədiyyələrlə mükafatlandırılıb.
Xəbərdən istifadə edərkən istinad etmək vacibdir.
