Fevralın 25-də Dini Qurumlarla İş üzrə Dövlət Komitəsinin (DQİDK) Sumqayıt bölgəsi üzrə şöbəsinin təşəbbüsü ilə Sumqayıt şəhəri Kotec qəsəbəsi "İmam Sadiq” məscidində Xocalı soyqırımı qurbanlarının anım tədbiri keçirilib.
Tədbirdə Sumqayıt Şəhər İcra Hakimiyyətinin (ŞİH) nümayəndəsi Fərman Kazımov, DQİDK-nın Sumqayıt bölgəsi üzrə şöbəsinin əməkdaşı Ülvi Məmmədov, Kotec qəsəbəsi "İmam Sadiq” məscidinin axundu Mirfəyyaz Fəttayev, din xadimləri və icma üzvləri iştirak ediblər.
DQİDK-nın Sumqayıt bölgəsi üzrə şöbəsinin əməkdaşı Ülvi Məmmədov Xocalı faciəsinin ermənilər tərəfindən xalqımıza qarşı yönəlmiş ilk soyqrımı aktı olmadığını bildirib. Qeyd edib ki, hələ XIX əsrin əvvəllərindən tarixi torpaqlarımızda məskunlaşdırılan ermənilər 1905-1906-cı illərdə, 1918-ci ilin mart ayının 31-də həmvətənlərimizə qarşı soyqırımı aktları həyata keçiriblər.
Sumqayıt ŞİH-in nümayəndəsi Fərman Kazımov Xocalı faciəsini faşizm dövründə yəhudilərə qarşı törədilən sistemli qətliamla müqayisə edərək ermənilərin 26 il öncə Xocalı sakinlərinə qarşı həyata keçirdiyi soyqırımı aktının bir xalqın əsrlərlə yaşadığı torpaqlardan izini silmək məqsədi daşıdığını bildirib. XX əsrdə dünyanın gözü önündə baş verən bu qətliama beynəlxalq səviyyədə lazımi hüquqi qiymətin verilməməsindən təəssüfləndiyini bildirib.
Məscidin imamı Mirfəyyaz Fəttayev Xocalı soyqrımının təkcə Azərbaycan xalqına qarşı deyil, bəşəriyyətə qarşı törədilmiş bir cinayət olduğunu bildirib. O qeyd edib ki, bu ağrılı-acılı tarixdən 26 il keçsə də Azərbaycan xalqı bu faciəni unutmayıb və heç vaxt unutmayacaq.
Tədbirin sonunda soyqırımı qurbanlarının ruhuna dualar oxunub.
Xəbərdən istifadə edərkən istinad etmək vacibdir.
