Tarix boyunca bütün müharibələrin gedişində bir dönüş nöqtəsi olub və bu, savaşın müqəddəratında böyük rol oynayıb. Aprel hadisələrini də Ermənistan-Azərbaycan Dağlıq Qarabağ münaqişəsində dönüş nöqtəsi kimi qiymətləndirsək, yanılmarıq. Ordumuzun bu hadisələr zamanı göstərdiyi şücaət belə deməyimizə tam əsas verir. Həmin günlər Azərbaycan xalqı həmrəylik nümayiş etdirdi. Siyasi mövqeyindən, sosial durumundan, maddi vəziyyətindən, əqidəsindən asılı olmayaraq hər bir kəs öz vətəndaşlıq mövqeyini göstərdi. Bu döyüşlərdə onlarla Vətən övladı canını, qanını torpaqlarımızın bütövlüyü uğrunda fəda etdi. Murad Məmmədov kimi...Murad bəlkə də bu borcu belə erkən – gənc yaşında qanıyla, canıyla şərəflə yerinə yetirəcəyini düşünməmişdi. Axı qəhrəmanlıq planlaşdırılmır. O, bir anın içində doğulur. Murad Məmmədov da cəbhə bölgəsində sinəsini düşmən gülləsinə sipər edərək 2016-cı ilin Aprel döyüşlərinə öz adını şəhid adı ilə qoşa yazdırdı Vətən daşına. O, düşünürdü ki, müstəqil Azərbaycanın sərhədlərini qorumaq bir hərbçi kimi onun da borcudur. Döyüş bölgəsi... Bu iki kəlmə özündə müharibə alovunu ehtiva edir. Bu kəlmələr eyni zamanda insana şəhid qanı ilə suvarılan bu torpağa tuşlanan hər bir mərminin, güllənin bir ürəkdən keçə biləcəyini, bir nəfəsi susdura biləcəyini xatırladır. Bütün bunları Murad da bilirdi. Yenə də yolundan dönməmişdi. Vətənə içdiyi andın müqəddəsliyini unutmur və aldığı hər bir tapşırığın məsuliyyətini dərk edərək onu yüksək səviyyədə yerinə yetirirdi. Elə buna görə də bir neçə gündə Azərbaycan hərbçilərinin göstərdiyi qəhrəmanlıqlar indi də düşməni qorxuya salıb. Və işğalçı ölkədə hər kəs-sıravi vətəndaşdan rəsmi şəxsə qədər Azərbaycan Ordusunun gücünü, qüdrətini etiraf etməyə başlayıb. Bu hissi onlara yaşadan hər bir igidimizin qəhrəmanlığı isə gənc nəsilə bir örnəkdir. Müstəqil Azərbaycanın torpaqlarına göz dikən düşmənlər bilməlidirlər ki, igid övladlarımız, qüdrətli milli Ordumuz xalqla birlikdə ayağa qalxıb, torpaqlarımızı azad edəcək, Şəhidlərin ruhları qarşısında vicdan borclarını yerinə yetirməklə zəfər marşını çalacaqlar.
GÜNDÜZ MƏMMƏDOV
Xəbərdən istifadə edərkən istinad etmək vacibdir.
