Havaların soyuması ilə yanaşı, Sumqayıtda əhalinin təbii qazla təminatında ciddi problemlər meydana çıxıb. Xeberle.com- a edilən müraciətlərdə şəhərin bəzi mikrorayon və məhəlləsində qaz probleminin yaşandığı bildirilir.
Məsələ ilə bağlı "Azəriqaz" İstehsalat Birliyinin Sumqayıt Qaz İstİsmar Sahəsi ilə əlaqə saxladıq. Qurumun baş mühəndisi Teymur Balıyev Xeberle.com-a açıqlamasında problemin səbəbini belə izah edib: "Havalar qəfil soyuduğundan maye qaza olan tələbat artıb. Bu da bəzi mikrorayon və məhəllədə maye qazın təzyiqində zəifləmələrə səbəb olub. Bu gündən etibarən bütün yaşayış məntəqələrində mavi yanacaqla bağlı problemlər aradan qaldırılıb və payız -qış rejiminə keçilib. Sumqayıt Qaz İstismar Sahəsi qış fəslinə tam hazırdır”.
Baş mühəndis həmçinin qeyd edib ki, istehlakçıların qaz təminatının yaxşılaşdırılması, əhalinin tələbata uyğun, fasiləsiz təbii qazla təmin olunması sahəsində bir sıra tədbir həyata keçirilir: "Ümumiyyətlə qaz xətti olmayan bir neçə məhəllə və küçələrə yeni qaz xətləri, eləcə də problemli ərazilərdə kəmərlər dəyişdirilərək qaz xətləri çəkilib".
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
