Dekabrın 26-da Sumqayıt Paralimpiya İdman Kompleksində respublikamızda ilk dəfə uşaq Paralimpiya idman festivalı keçiriləcək.
AzərTAc xəbər verir ki, festival Azərbaycan Milli Paralimpiya Komitəsi (AMPK) ilə BMT–nin Uşaq Fondunun Azərbaycan nümayəndəliyi (UNİCEF) arasında imzalanmış Anlaşma Memorandum çərçivəsində təşkil olunacaq.
Festivalın keçirilməsində əsas məqsəd Azərbaycanda Uşaq Paralimpiya Hərəkatının genişləndirilməsi, sağlamlıq imkanları məhdud uşaqları idmana cəlb etməklə, onların reabilitasiya yolu ilə cəmiyyətə inteqrasiyalarının təmin edilməsinə şəraitin yaradılmasıdır. Eyni zamanda əlil idmanı və Paralimpiya dəyərlərini geniş əhali kütləsi arasında təşviq etməklə fiziki qüsurlu gəncləri xüsusən uşaqları Paralimpiya hərəkatının fəal üzvlərinə çevirməkdən ibarətdir.
Qeyd edək ki, cari il sentyabrın 27-də dünyada ilk dəfə olaraq AMPK–nin nəzdində Uşaq Paralimpiya Komitəsi yaradılmış və ölkəmizdə Uşaq Paralimpiya hərəkatının inkişafına dəstək olaraq oktyabrın 8–də AMPK və UNİCEF arasında Anlaşma Memorandumu imzalanıb.