Hər bayramın öz gözəlliyi olduğu kimi, Yeni ilin də özünəməxsus gözəllikləri, tərəfləri var. Hər bir insanın arzuları var. Kiminin arzuları, hədəfləri böyük, kiminin arzuları isə uşaq arzuları qədər məsum olur. İnsana elə gəlir ki, Yeni ildə hər bir şəxs arzusuna daha bir addım yaxınlaşmış olur. Ona elə gəlir ki, əvvəlki illərdə çin olmayan arzuları növbəti ildə həyata keçəcək. Buna görə də Yeni il həmişə xüsusi nikbinliklə qarşılanır. Bu, həmişə belə bir hiss oyadıb. Şaxta baba gələcək, hər hansı bir arzumu həyata keçirəcək. Şaxta baba da “deyir ki”, arzunu diləmək sizdən, həyata keçirmək Allahdan, hədiyyələr isə məndən... Gəlin raızlaşaq ki, ən çox arzu edənlər elə gənclərdir, elə ən maraqlı da onların arzuları olur. Bayramöncəsi sumqayıtlı gənclər arasında bu mövzuda sorğu keçirdik. Respondentlərimizə “Yeni ili necə keçirməyi planlaşdırırsınız? Şaxta babadan nə istəyirsiniz?” sualını ünvanladıq.

Əfsər Əliyev, 20 yaş - Dostlarımla keçirəcəm. Amma harada..., onu bilmirəm. Hədiyyələr istəyirəm.

Mirzə Mirzəyev, 22 yaş - Həmin gün mən işdə olacağam. Çünki təyinatlı hərbçiyəm. Hər şeyin yaxşı olmasını, hər kəsin hər atdığı addımı uğurlu olmasını istəyirəm.

Qabil İsmayılov, 25 yaş - Bilmirəm hələlik. Yəqin ki, evdə olacağam. Şaxtasız hava istəyirəm.

Rəvanə Məmmədova, 26 yaş - İşimiz çox olduğundan ailəmlə evdə olacağam. Ev istəyirəm.

Günel Əliyeva, 18 yaş -  Evdə, ailəmlə. Hədiyyələr istəyirəm.

Orxan Həsənov, 27 yaş - Park Bulvarda olacağam. Cansağlığı istəyirəm.

Eşqin Hacıyev, 22 yaş - 31 Dekabrda mən işdə olacağam. Xoş münasibətlər istəyirəm.

Ağa Tahirli, 27 yaş - Dostlarımla keçirəcəyik, amma yer hələlik bəlli deyil. Ev istəyirəm.

Qasım Hacızadə, 20 yaş - Dostlarımla keçirəcəyəm. Əminəm ki, super bir gün olacaq. Hədiyyələr istəyirəm.

Elçin Əlizadə, 24 yaş - Evdə, ailəmlə olacağam. Uğurlu karyera istəyirəm.

Yusif Abdullayev, 28 yaş - Türkiyəyə getməyi düşünürəm. Xoşbəxtlik istəyirəm.

Ayan Əliyeva, 21 yaş - Ailəmlə olacağam. Qardaşımın sağ-salamat əsgərlikdən qayıtmasını istəyirəm.

Məmməd Aslanov, 22 yaş - Gürcüstana getmək planımız var. Pul istəyirəm.

Emil Əliyev, 26 yaş - İşdə olacağam. Maaşların artmasını istəyirəm.

Fəridə Həsənova, 30 yaş - Ailəmlə gəzintiyə çıxmağımız var planda. Pul istəyirəm.

Xədicə Əliyeva, 29 yaş - Hələ bilmirəm. Maaş artımı istəyirəm.

Fəridə Hüseynli, 22 yaş - Dostlarımla olacağam. Xoşbəxtlik istəyirəm.

Türkan Heydərova, Xeberle.com

P.S. 55 yaşlı Rəhilə Ağayeva və 52 yaşlı Məlahət Heydərova isə bayramı övladlarını bir yerə toplayaraq evdə keçirmək istəyir! Rəhilə xanım bütün doğmlarına, bütün sumqayıtlılara, hər bir azərbaycanlıya cansağlığı istəyir. Məlahət Heydərova isə cansağlığı ilə yanaşı, ev arzulayır.