Sumqayıtda yeni təmirdən çıxmış 1 saylı şəhər xəstəxanasında qəribə hadisə baş verib.

Belə ki, xəstəxanada yenicə quraşdırılan MRT və Rentgen aparatları ətrafı şüalandırmağa başlayıb. Ətrafın şüalanmaya məruz qalmasına səbəb aparatların səhv quraşdırılması olub. İnterpress.az-ın məlumatına görə, əraziyə gələn Fövqəladə Hallar Nazirliyinin əməkdaşları şüalanmanın təsirini azaltmaq üçün ətrafa qurğuşun maddəsi töküb. 

Xəbərdə deyilir ki, həkim personalından özünü pis hiss edənlər, ürəkbulanması, baş gicəllənməsindən əziyyət çəkənlər var. Şüalanma haqda pasientlərin xəstəxanaya daxil olanda vəziyyətlərinin dəyişməsi ilə bağlı şikayətindən sonra xəbər tutulub. 

Hadisə ilə bağlı Səhiyyə Nazirliyinin mətbuat xidmətinin rəhbəri Anar Qədirli isə İnterpress.az-a deyib ki, xəstəxana personalı və pasientlərin şüalanması haqda xəbər onlara daxil olmayıb. Lakin Fövqəladə Hallar Nazirliyinin əməkdaşlarının əraziyə gəlib qurğuşun tökməsi haqda məlumatları var.