İnsanlar hər zaman - aktiv, yaxud passiv - fəaliyyətdədirlər. Kimisi oxuyur, kimisi işləyir, kimisi əylənir. Amma istənilən halda hər kəsin istirahətə ehtiyacı var. Bunun üçün sakinlərimiz şəhərimizdəki parklara və restoranlara, yaxud hansısa dilbər bölgələrimizə, hətta ölkə kənarına belə gedirlər. Ən çox istirahət ayları üçün yay fəsli seçilsə də, qışda da istirahət edənlər var. Həftə sonları ailəsi və ya dostları ilə də vaxt keçirmək istəyənləri də unutmaq olmaz. Bəs bu insanlar üçün şərait varmı? Onlar öz istirahətlərini şəhərimizdə - Sumqayıtda təmin edə bilirlərmi? Şəhər sakinlərinin bu haqda fikirlərini öyrəndik. Onlara aşağıdakı suallarla müraciət etdik.
“Qışda harada istirahət edirsiniz? Gənclərimizin istirahəti üçün Sumqayıtda hansı məkanlar çatışmazlıqlar var? Sizcə, konkret nələrə ehtiyac var?”
Arifə Hüseynzadə, 19 yaş, tələbə- Qışda olmaq istədiyim ölkə var. Bu, Finlandiyadır. Ən yaxşı qışı keçən ölkədir. Yeni ili tam fərqli olur. Sumqayıtda, məncə, gənclərin istirahəti üçün çatışmazlıq özlərindədir. Düzdür, özüm də gəncəm, amma adam fikir verir ki, eyni yaş qruplarımızda “avaraçılıq” var, gənclər üçün hər şey biranlıqdır. Gələcəklərini isə fikirləşmirlər. Amma Sumqayıtda istirahət üçün, “Boulinq” zalları olsa, lap yaxşı olar.
Emil Maqalov, 38 yaş, “Azərikimya” İB, kadr mütəxəssisi
- İstirahətimi Moskva, Antalya və Dubayda keçirmək istərdim. Sumqayıtda isə heç adı çəkilə biləcək bir yer yoxdur. Dəniz kənarı abadlaşdırılmalı, müxtəlif əyləncə və digər tədbirlər üçün yerlər ayrılmalı, tikilməli və yenidən qurulmalıdır. Adıçəkilən tikililər olsa belə, əlavə bizə minimum 10 il lazımdır ki, bunu qəbul edib Sumqayıta üstünlük verək. Məsələn, Dubaya 3 günlük təyyarə, otel, yemək və transfer 280-320 manat arası olduğu halda Sumqayıtda 10 nəfərlik restoranda yemək 300 manata başa gəlir. Bu, çox bahadır. Məsələn, Novruz bayramını Moskvada keçirməyim 600 manata başa gələcək. Burada-Sumqayıtda nə edə bilərdim?!Anar Yusifov, 28 yaş, mühafizə alayında baş mühafizəçi
- Qışda dincəldiyim yer adətən ev olur. Sumqayıtda çatışmayan yer - ailəvi dincəlməli sakit məkanlardır.Murad Ağamiyev, 19 yaş, tələbə
- Qışda istirahət etmək üçün vaxtım olmur. Sumqayıtda demək olar ki, gənclərin asudə vaxtının səmərəli təşkili və əyləncəli istirahət etməsi üçün şərait yoxdur. Yaxşı olardı ki, Gənclər şəhəri olan Sumqayıtda şəhər rəhbərliyi mərmər, bardur, alkopan, dükan, bahalı dirəklipark, tamet və sair işlərlə yanaşı, bir neçə əyləncə kompleksi və alış-veriş mərkəzi yaratsın. Çox vacibdir. Şəxsən mənim Türkiyədən, İrandan, Gürcüstandan, Rusiyadan gələn qonaqlarım olur. Onlar Sumqayıtın çox cansıxıcı olduğunu deyirlər.Daşqın Qaraşlı, 40 yaş, “Günəş” jurnalının əməkdaşı
- Sumqayıtda həyətlərdə uşaqlar üçün istirahət etməyə, oynamağa yerlər ümumiyyətlə yoxdur. Bu da gənc ailələrin, uşaqları olan ailələrin ən yaralı nöqtəsidir. Məsələn, mənim uşaqlarım və həyətimizdəki uşaqlar yayda həyətdə oynamağa yer tapmırlar. Aynabəndə yaxın oynayanda qonşular ordan-ora qovur. Məcbur olub maşın yolunda oynayırlar. Bu da həyatlarına təhlükə yaradır. Bunun əziyyətini də gənc ailələr çəkir. Normal ölkələrdə hər bir binanın ümumi həyətində uşaq şəhərcikləri olur. Bizdə isə olan-qalan uşaq şəhərciklərinin də yerində xeyir-şər evi və dükan tikiblər.Həmid Sultan, 18 yaş, ofisiant
- Sumqayıtda biz gənclər üçün bütün şərait var. İstirahətə “yüksək Avropa standartlarına cavab verən 1 manatlıq çayxanalar” açılıb. Təşəkkür edirəm.Samirə Əliyeva, 19 yaş, tələbə
- Demək olar ki, qışı elə Sumqayıtda keçirirəm. Düzdür, park var. Amma əyləncə mərkəzləri olsa, daha yaxşı olar. Məsələn, Bakıdakı “Megafun”dan Sumqayıtda da açılsa, əla olar.
İsmayıl Kərimov, 39 yaş, Prezident Yanında Dövlət İdarəçilik Akademiyasının müəllimi- Qışda demək olar ki, istirahət üçün bir yerə getmirəm. Sumqayıtda gənclərin istirahəti üçün əsas çatışmazlıq “Bouling” zalın və kinoteatrın olmamasıdır. Məncə, bunlar olsa, çox yaxşı olardı.
Sevda Əkrəmqızı, 31 yaş, psixoloq
- İstirahət etmirəm. Analıq məzuniyyətindəyəm. 2 körpə uşağa baxıram. İstərdim ki, Sumqayıtda gənclərin istirahəti üçün böyük kinoteatr və gözəl əyləncə mərkəzi açılsın.Pərviz Şükürlü, 20 yaş, tələbə
- Qışda istirahət etməyi xoşlamıram. İstirahətə yaz və yay aylarında hər il dostlarımla Azərbaycanın bölgələrinə, ən çox da şimal bölgəsinə gedirik. Sumqayıtda gənclərin istirahəti üçün yer çox azdır. Mənim fikrimcə isə çayxana gənclərimizə istirahət üçün yer deyil. Mən belə fikirləşirəm ki, Sumqayıtımızda biz gənclər üçün mədəni, içkisiz, musiqili klublar açılmalıdır. Tələbələrimiz üçün dərsdən sonra getmək üçün müxtəlif növ dərnəklər yaradılsın. Avtomobili istədiyimiz kimi sürmək üçün xüsusi yerlər ayrılsın.
Rəhilə Abdullayeva, 17 yaş, tələbə
- Sumqayıtda istirahət edirəm. İstirahət üçün, piknik etmək üçün yer yoxdur. Nələrin olmasının vacibliyinə qaldıqda isə çox şey olmalıdır.
Sabir Abbasov, 17 yaş, aktyor
- Qışda istirahətə getmirəm. Sumqayıtda gənclərin normal istirahət etməyi üçün müvafiq yerlərin açılmasını istəyirəm.
Türkan Heydərova, Xeberle.com
Xəbərdən istifadə edərkən istinad etmək vacibdir.
