Sumqayıtda ötən gecə yanğın hadisəsi baş verib.
Xeberle.com-un məlumatına görə, yanğın 23 nömrəli məktəbdə olub. Belə ki, məktəbin 1-3-cü mərtəbələrində müxtəlif nöqtələrdə xırda yanğınlar qeydə alınıb. Yanğınsöndürənlər tərəfindən alov ram edilib və digər ərazilərə keçməsinin qarşısı alınıb.
Xeberle.com-un araşdırmasına görə, yanğının kənar təsirlərin müdaxiləsi nəticəsində baş verdiyi ehtimal edilir.
Maraqlısı odur ki, məktəbin birinci mərtəbəsində pəncərələrdən biri sındırılıb və güman ki, buradan içəriyə naməlum şəxslər daxil olub. Daha bir təəccüb doğuran hala diqqət çəkək. Əgər yanğın insan müdaxiləsi olmadan olsa idi, eyni ərazidən baş verib digər hissələrə keçərdi. Amma bu hal qeydə alınmayıb.
Belə ki, 1-ci mərtəbədə iki stul, 3-cü mərtəbədə sinif otağında 5 kvadratmetr ərazidə şkaf, dəftər-kitab, otaqların birində süfrə və müəllimlər otağının qapısı yanıb. Bu baş verənlər yanğının qəsdən törədildiyini və naməlum şəxs və ya şəxlərin tez yanan materialları alışdırması ehtimalını daha da gücləndirir.
Məktəbdən isə Xeberle.com-a bildiriblər ki, hadisə ilə bağlı polis araşdırma aparır: "Hazırda polislər burdadır. Araşdırma aparılır. Əlavə məlumat verə bilməyəcəyik".
Hər halda, aparılan araşdırma hadisənin baş vermə səbəbini ortaya çıxaracaq.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
