Sumqayıt Xəzərin sahilində yerləşən şəhərlər sırasında ən gənci və müasiridir. Şəhər sahilboyu salındığı və çox böyük olmadığı üçün onun istənilən yerindən maksimum 30 dəqiqə müddətində piyada dəniz sahilinə çatmaq mümkündür. "Gənclər şəhəri"ndə son illər inkişaf və canlanma müşahidə olunur. Rayonlardan əvvəlki kimi Sumqayıta işləmək yaxud yaşamaq üçün axın mövcuddur. Belədə maraqlıdır, görəsən Sumqayıtın hansı mikrorayon yaxud məhəlləsi yaşayış üşün daha əlverişlidir, sakinlər daha çox hansı ərazilərə üstünlük verirlər? Bu şəhərdə doğulub, uşaqlığını, gənclik və yeniyetməliyini ona doğma olan məhəllələrində, küçələrində keçirən hər kəsə təbii ki, şəhərin hər guşəsi gözəldir. Lakin infrastruktur, ictimai nəqliyyat, məhəllə daxili yollar, kommunal xidmətlərin keyfiyyəti (xüsusən istilik sistemi), sərfəli qiymətli market yaxud restoranlar, rahat məktəb bağça, hətta kriminal və təhlükəsizlik baxımından da hansı mikrorayon və ya məhəlləni yaşamaq üçün daha əlverişli olduğunu bilmək maraqlı olardı.
Xeberle.com olaraq elə bu sualla bağlı şəhər əhalisi arasında internet sorğu keçirdik.
Sorğunun nəticələrinə görə ümumi olaraq belə aydın olur ki, əhali məhəllə və qəsəbələrə nisbətən daha çox mikrorayonlarda yaşamağın əlverişli olduğunu düşünür. Fasiləsiz istilik enerjisi, işıq, su, qaz təminatına görə şəhərin 9,10,11,12,13 və 17-ci mikrorayonları yaşamaq üçün daha əlverişlidir, deyə düşünən əhali üstünlük təşkil edir. Lakin bağça, məktəb, market, ticarət mərkəzləri, iş yerləri, bankların yerləşməsi strukturuna görə isə şəhərin mərkəzi hesab olunan avtovağzal, mərkəzi bazar ətrafı və məhəllələrinə üstünlük verənlər də az deyil. Ayrılıqda isə daha maraqlı fikirləri seçib sizin ixtiyarınıza vermək qərarına gəldik ki, şəhər sakinlərinin doğma məskənləri haqda dedikləri ilə tanış olaq.
-Yaxşi və aktual mövzudur. Mikrorayon va məhəllələri 2 yerə bölərdim. Şəhərin səs-küysüs və sosial təminatlı yerləri. Sosial təminatlı mikrorayon va məhəllələr 18 və 3-cü mikrorayonlar, birləşmiş məhəllədir, məncə. Lakin sakit va rahat yer istəsək, 3,1,5 və 9-cu məhəllələri nəzərdə tuta bilərik. Yuxarıda qeyd etdiyim mikrorayonların dövlət tərəfindən istilik qazanxanaları ilə təchizatı olduğundan bu mikrorayonları daha çox sosial təminatlı mikrorayonlar sırasına aid etmək olar. Bir də ictimai nəqliyyatın intensiv, əlçatan mikrorayon və məhəllələri də demak olar ki, sadaladığım yerlərdir.
- 44-cü məhəllədə hər şey var: məktəb, uşaq bağçası, idman kompleksi, klinika, universitet, restoranlar, istirahət və əyləncə mərkəzləri, Kimyaçı mədəniyyət sarayı, Vergilər idarəsi, park və müxtəlif ictimai - iaşə obyektlərinə yaxın olan bir ərazi olması ilə xüsusi seçilir. Kiçik bir ərazini əhatə etməsinə baxmayaraq banklara da yaxınlığı yaşamaq üçün əlverişli şəraiti olmasının sübutudur.
-1, 2, 5, 6 və qismən də 9-cu mikrorayonlar, düşünürəm ki, ən əlverişliləridir. Bu mikrorayonlar parka, bulvara, alış-veriş mərkəzlərinə yaxın olduğundan əhalinin yaşayışı üçün daha çox rahatdır. Ən azından evindən çıxıb tez bir zamanda parkda gəzə, idman edə bilərsən. Mən 17-ci mikrorayonda yaşayıram. Axşam saatlarında asudə vaxt keçirmək üçün heç bir yer yoxdur. Yeni 9-cu mikrorayon parka yaxın olması və bütün istiqamətlərə asan çıxışı ilə əlverişlidir. Dənizə də yaxın ərazidədir. Bir çox idarələrin orada yerləşməsi, misal üçün sosial pensiya fondları, məşğulluq, məhkəmə, poçt və sair bu mkr-nu asanlıqla idarələr mikrorayonu adlandırmağa imkan verir.
- Yəqin ki, 12-ci mikrorayon ən münasibdir. Dəmiryol vağzalı, Bakı-Sumqayıt marşrut avtobuslarının dayanacağına yaxın, bütün şəhər avtobuslarının keçdiyi ərazi, ticarət mərkəzlərinə yaxın, küçənin digər tərəfində poliklinika, 2 məktəb, 2 bağça, poçt, diş klinikası, yeni asfalt örtüyü və s...
- 17 mikrorarayon ən normalı, elə ən çox yaşıllığı olan mikrorayondur. Həyətlərin hamısı besetka və skamyalarla təmin olunub. Yerləşdiyi ərazi də digər mikrorayonlara nisbətən hündürdədir. Həmçinin bu ərazi 24 saat fasiləsiz su ilə təmin olunur, tez tez beynəlxalq və yerli idman yarışlarına şahidlik edir. (Olimpiya kompleksi). Əksər idman növləri üzrə bölmələr burada fəaliyyət göstərir. Texniki xidmətlər, nəqliyyat avadanlıqları mağazaları, nəqliyyat satış mərkəzləri və tikinti materialları dükanları ilə əhatə olunub. Şadlıq sarayları bu mikrorayona sanki xüsusi bir özəllik verir. Ən əsası isə 17-ci mikrorayonun bütün binaları istilik sistemi ilə tam təchiz olunub.
- Ən məqsədəuyğun yer öz yaşadığım 1-ci mikrorayon ərazisidir. Çünki burada iri marketlər olmadığına görə məhələdə sakitçilikdir. Ərazisi geniş və təmizdir. Bundan əlavə, bazar, dəniz, park yaxınlığında yerləşir. Ərazidə bağça və məktəblər də var.
Sumqayıtın bütün mikrorayon və məhəllələrinin gözəl və əlverişli şəraiti olduğunu düşünənlər də az deyil. Onlar bildirir ki, Sumqayıtın hər yeri gözəldir: hara baxırsan abadlıq, gözəl binalar, şüşə kimi yollar. Bütün binalar rənglənir, onların dam örtüyü təzələnir, bloklar təmir olunur, yol kənarları gül-çiçəyə bürünür, həyətlərin içində köhnə ağaclar budanir, səliqəyə salınır. Sumqayıt sakini kimi, həqiqətən ürəyimiz açılır. İndi Sumqayıtın mərkəzi, kənarları anlayışı itib, çunki ən kənar hesab olunan mikrorayonlarda belə, bu işlər görülür.
Sorğunun nəticələrinə görə, şəhərimizdən narazı olanlar da var.
- Dam örtükləri yenilənsə, suyu saatla gəlməsə, istilik sistemi normal işləyərsə birləşmiş məhəllə şəhərin ən gözəl ərazisidir.
- Ən pisi Qurd dərəsi yaşayış massividir. Nə məktəbi, nə bağçası, nə də poliklinikası var. Yollarımız bərbad vəziyyətdədir.
- Xəzər bağları ərazisinə də marşrut avtobus xətti açılsa, yollar düzəlsə, pis olmazdı. Qaranlıq düşənə qədər harda olsan, məcburi evə qayıtmaq məcburiyyətindəsən. Görəsən Xəzər bağları massivi nə vaxt ağ günə çıxacaq. Sanki, yaddan çıxmış bir ərazidir.
- Soyuğu sevənlər 48-ci məhəllədən ev alsın, çünki bütün qışı donmuş vəziyyətdə qalırıq.
-Dənizimiz var, gəmi gəzintisi də olacaq. Bircə bu H.Z.Tağıyev qəsəbəsində də bir Kutaisi kimi aşağı büdcəli aviareyslərin uçduğu balaca bir aeroport tiksəydilər, əla olardı.
Bəs görəsən ömrünün 40 ilini bu şəhərdə keçirmiş, ata-anası da doğma şəhərin hər guşəsinə bələd olan Sumqayıt sakini Şahin Asəf bu barədə nə düşünür?
- Ümumilikdə götürsək, Sumqayıtın hər yeri gözəldir. Lakin əlverişli şəraitə qalanda isə, əvvəllər Sumqayıtın mərkəzi hesab olunan birləşmiş məhəllə indi boş bir əraziyə çevrilib, sanki. İndiki zamanda ən gözəl şəraiti olan ərazi kimi 17-ci mikrorayonu daha çox bəyənirəm. Hərtərəfli olaraq bu ərazi yaşamaq üçün əlverişlidir. Bir-iki xırda çatışmazlıqları nəzərə almasaq, bu gün demək olar ki, 17-ci mikrorayon ən əlverişli ərazidir. Ticarət mərkəzləri, xırda alış-veriş butikləri, bank şöbələri bu mikrorayona cəlb olunarsa, demək olar ki, mərkəz hesab oluna bilər.
Bu sorğu nəticəsində ümumilikdə məlum oldu ki, sakinlər tərəfindən daha çox istilik sistemi ilə təchiz olunan, liftləri yenilənən və daxili yolları yaxşı olan mikrorayon və məhəllələri yaşayış üçün əlverişli hesab edilir.
Məsələn 17, 18 və 3-cü mkr.ların mərkəzləşdirilmiş istilik sistemi ilə təchiz olunması onlara böyük üstünlüklər verir. Son aylarda şəhərin lift təsərrüfatında da canlanma və yenilik müşahidə olunur. Məsələn, 18-ci və 17-ci mkr.-da liftlərin hamısı tamamilə yenilənərək müasir liftlərlə əvəz olunub və 18-ci mkr.-da hamısı, 17-ci mkr.-da isə bir hissəsi intellektual idarəetmə sisteminə - Mərkəzləşdirilmiş Dispetçer Xidməti sisteminə (MDX) qoşulub. 3-cü, 2-ci mkr. və 45-ci məhəllənin də liftləri yenilənərək MDX sisteminə keçib. 12-ci və 6-cı mkr.-da da liftlər daha müasirləri ilə dəyişdirilib. Bu işlərin tezliklə istilik sistemi və damların yenilənməsi istiqamətində də görməyə ümid edirik.
Sonda onu da qeyd edək ki, bu şəhərdə övladlarımızın təhsili üçün də gözəl imkanlar var. Sumqayıtın harasında yaşasaq, oraya yaxın azı bir məktəb, bağça mütləq var. Sumqayıt, heç kimin yerli olmadığı, hamının əslində Azərbaycanın, keçmiş SSRİ-nin hər yerindən bura gəldiyi, qurub yaşadığı bir şəhərdir. Çünki Sumqayıt sülh şəhəridir. Bu şəhəri müxtəlif mədəniyyətlərdən, millətlərdən olan insanlar qurublar, tikiblər. İndi də Sumqayıt Azərbaycanın ən qabaqcıl insanlarını yetişdirməkdədir. Və bu şəhər günü-gündən sürətlə böyüyür, gözəlləşir.
Bu şəhərdə sevgi və güvən var.
Xədicə Səxavət
Xeberle.com
Xəbərdən istifadə edərkən istinad etmək vacibdir.
