Prezident İlham Əliyevin iş qrafiki həmişəki kimi çox sıxdır, günləri müxtəlif şəhər yaxud rayon sakinləri ilə görüşlərlə, yeni müəssisə və zavodların açılışları ilə, rəsmi səfərlərlə DOLUDUR. Ölkə başçısı çalışır ki, müxtəlif sənət yaxud peşə sahiblərini, ziyalıları, sadə vətəndaşları şəxsən qəbul etsin və problemləri ilə yaxından maraqlansın. Son baş verən görüşlər də bunun əyani sübutudur. Bu da hər bir Azərbaycan vətəndaşının qəlbində ölkənin gələcək inkişafına, insanların maddi rifahı halının daha da yaxşılaşdırılmasına olan inamı artırır. İlham Əliyevin bu yaxınlarda Sumqayıt səfəri də böyük təəssürat və ümidlərlə yadda qaldı. Təbii, hər bir Sumqayıt sakininin o açıq formatda olsm görüşdə iştirak edərək arzusunu birbaşa rəhbərə söyləməsi praktiki mümkün deyildi. Odur ki, "Bir vətəndaş olaraq prezidentlə görüşmək şansınız olsaydı, ondan Sumqayıtla bağlı nə xahiş edərdiniz?" adlı sorğuyla şəhər əhalisinin sosial şəbəkələrdə fəal olan qisminə müraciət etdik. Təbii ki, yaş fərqinə görə düşüncələr fərqli olduğu kimi, sorğumuza verilən cavablar da müxtəlif oldu.

 

Bəziləri şəxsi problemlərini dilə gətirdi, bəziləri isə şəhərimiz üçün yenilik və dəyişikliklərin olması istəyini bildirdi.

Keçirilən sorğuya əsasən daha maraqlı və daha çox təkrarlanan xahişlərlə oxucularımızı tanış edirik.

-Mehdi Hüseynzadə stadionunun əsaslı təmir olunmasını istərdim.

-Deyərdim ki,yaşadığımız yataqxana plana düşsəydi, bizim də evimiz olardı, mətbəximiz evimizdən nə qədər uzaqdır, gedib gəlməkdən bezmişik.

- Sumqayıtda narkomaniya ilə ciddi şəkildə mübarizə aparılsın, Sumqayıt gəncliyi əldən gedir

-Sumqayıtın havası nə vaxt təmiz olacaq, zavodların filtrlənməsi nə vaxt baş tutacaq?

-Şəhərimizin tezliklə istilik təchizatı ilə tam təmin edilməsini.

-İşsizlik və Məşğulluqla bağlı əməli layihələrin keçirilməsini.

-MİS-lərin təcili ləğv edilməsini.

-Yaşıldərə yaşayış massivində kanalizasiya sisteminin qurulmasını, yollarının təmir edilməsini, evlərin sənədləşdirilməsini.

-Kottec yaşayış massivində fərdi yaşayış evlərinin torpaqlarının maneəsiz özəlləşdirilməsini.

-Dənizkənarı parkdakı bütün obyektlərin sökülməsi və meşə massivinin artırılmasını.

-Bəzi binalarin fasad bərpa işlərinin aparılması ilə bağlı müraciət edərdim, bərk külək olan kimi blokların şüşələri camaatın üstünə düşür.

- Sumqayıtda normal və real iş yerlərinin olmasını.

-Prezidentimizdən xahiş edərdim Sumqayıta yerüstü metrostansiya açılsın.

-İcra başçısı canlı yayım təşkil edərək insanların problemlərini birbaşa dinləsin və həll etsin.

-Vaxtı ilə zavodlarda ev növbəsinə duran insanların mənzillərinə qaçqın və məcburi köçkünlər yerləşdi. Həmin insanların ümüdlə gözlədiyi evlərinin özlərinə qaytarılmasını, ev növbəsində olan Qarabağ əlilləri və şəhid ailələrinin mənzil probleminin tezliklə həll olunmasını.

-Çoxlu idarələr açılsın, işsizliklə bağlı problemlər aradan qaldırılsın.

-Zavodlarımız işə düşsün və əvvəlki vaxtlarda olduğu kimi hər kəs işlə təmin olunsun.

-Sumqayıt şəhəri və ətrafı azad iqtisadi zona olsun. Beynəlxalq dəniz limanı açılsın.

-Corat, Kottec və H.Z.Tağıyev qəsəbələrindəki məhəlləarası yollar təmir edilsin. Piyada yolları salınsın.

Bunlar Sumqayıt vətəndaşlarının prezidentimizə olan müraciətləri idi. Ümüd edirik, digər problemlər kimi, şəhər əhalisinin müraciətləri də dinləniləcək və həlli üçün çıxış yolları axtarılacaq.

Xədicə Səxavətqızı

Xeberle.com

Xəbərdən istifadə edərkən istinad etmək vacibdir.