2018-ci ildə Ermənistana gedib sığınacaq istəyən və bu ilin iyuk ayında Azərbaycana qaytarılan Sumqayıt şəhəri Corat qəsəbəsinin sakini Gülnarə Tarverdiyeva ona göstərilən biganə münasibətdən şikayətçidir.
11 ay Ermənistanda yaşayan Sumqayıt şəhər Corat qəsəbəsinin sakini 54 yaşlı G. Tarverdiyeva "Azad söz” yutub kanalına müsahibəsində yaşayış yerinin olmadığını və kirayələrdə qaldığını deyir. O, həmçinin kimsəsiz olduğunu bildirib.
Xeberle.com sözügedən məsələ ilə bağlı araşdırma aparıb. Araşdırma nəticəsində məlum olub ki, G. Tarverdiyevanın Corat qəsəbəsində fərdi yaşayış evi mövcuddur. Bu yaşayış evinin Sumqayıt sakini, usta Vüqar Sadıxov tərəfindən inşa edildiyi də üzə çıxıb.
Usta Vüqar Sadıxov Xeberle.com-a açıqlamasında həmyerlisi Gülnarə Tarverdiyeva üçün ev tikdiyini təsdiqləyib. V. Sadıxov xanımı ondan hüquq-mühafizə orqanlarına şikayət etdiyini də qeyd edib: "Gülnarə xanım polisə şikayət edib, məhkəmə tikinti ekspertizası gəlib evə baxış keçirib. Ev tikilib, amma Gülnarə xanım məni aldatdı pul vermədi. Ev tikintisi başlayan zaman danışdığımızdan əlavə işlər artırdı və onların pulunu mənə vermədi”.
G. Tarverdiyevanın evi.
Usta deyir ki, həyətdə olan köhnə tikililərin sökülməsi, əlavə olaraq hamam-tualet tikintisi də nəzərdə tutulmasa da G. Tarverdiyeva bu işləri də ona gördürüb. Amma əlavə ödəniş etməkdən isə imtina edib: "Bunların hamısı əlavə işlər idi, lakin heç biri üçün ödəniş etmədi. İlkin danışığımız 25 min manat olmuşdu, lakin sonradan işə əlavələr etdi və mənə dedi ki, işlə 5-6 min də verəcəm. O mənə söz verdiyi zaman mənim yanımda şahidim də olub. Amma sonradan o, dediyi sözdən boyun qaçırdı və mənim pulumu vermək istəmədi. Bu məsələyə 1-ci bölmənin müstəntiqi hüquqi qiymət verib. Əvvəl danışdığımız işi bitirəndə mən ondan 25600 manat pul almışam. Sonradan edilən əlavələrlə evin tikintisi 32 min manata sonlanmalı idi. Dediyi işlərin hamısını tam olaraq bitirmişdim. Münasibətimiz heç vaxt pis olmayıb, həmyerlim kimi hər zaman aramızda səmimi münasibət olub, lakin sonradan pulu vermək istəmədi”.
G. Tarverdiyevanın evi.
Heç kiminin olmadığını deyən G. Tarverdiyevanın Ziba adlı bacısının olduğu da üzə çıxıb. Və həmin şəxsin də Corat qəsəbəsində 2 mərtəbəli fərdi yaşayış evi var.
"G. Tarverdiyevanın nevroloji problemləri mövcuddur. Mütəmadi olaraq müalicə proseduru keçir.”
Bu barədə isə Xeberle.com-a Sumqayıt şəhər 4 saylı şəhər poliklinikasının baş həkimi Canıbəy Ağayev deyib. Onun sözlərinə görə, Gülnarə Tarverdiyevanın diaqnozu tez-tez baş verən qıcolma tutmaları ilə isterik nervozdur: "2004-cü ildə həmin diaqnozla 1 nömrəli şəhər xəstəxanasında stasionar müalicə alıb. 2007, 2014- cü illərdə isə 4 nömrəli xəstəxanada yenə də həmin diaqnozla müalicələr alıb. Dərman preparatları ilə bağlı təyinata uyğun nə lazım olsa və şəkər aparatı və testlə də təmin edirik”.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
