Bu gün Sumqayıtın hər bir qarışında bayram əhval-ruhiyyəsi hiss olunur. Bu, təbiidir. Çünki biz sakinlər öz doğma şəhərimizin - vaxtilə SSRİ-nin əsas neft-kimya kompleksinin cəmləşdiyi sənaye mərkəz kimi tikilən, bu gün isə inkişaf edərək, müasir infrastrukturu, qabaqcıl texnologiyaları, mədəni- məişət şəbəkəsi olan coğrafi məkana çevrilən Sumqayıtın 70 illik yubileyini qeyd edirik.
Bu sözləri AZƏRTAC–a müsahibəsində "Azərikimya” İstehsalat Birliyinin etilen-polietilen zavodunun direktoru Oqtay Niftəliyev deyib.
O qeyd edib ki, vaxtilə insanlar, əsasən də gənclər respublikamızın bütün rayonlarından böyük ümidlərlə Sumqayıta gəlib, buradakı tikinti və quruculuq işlərində çalışıb, sonra da ailə quraraq Sumqayıtı özlərinə tale şəhəri seçiblər. Məhz buna görə də Sumqayıt "gənclər şəhəri” adlanıb. SSRİ dövründə əsas kimya müəssisələri burada inşa olunduğundan, sonradan Sumqayıtın adına "kimyaçılar şəhəri” də əlavə olundu. Bu gün də Sumqayıt hər iki statusu adında qoruyub saxlayır.
Oqtay Niftəliyev bildirib ki, Sumqayıt kimyaçıları gələn il öz 75 illik bayramını qeyd edəcək. Bu zaman kəsiyində Sumqayıt kimyaçıları şərəfli yol keçib. Artıq, bütün fiziki və mənəvi cəhətdən köhnələn müəssisələr fəaliyyətini dayandırıb, əvəzində infrastruktur müasirləşdirilərək, yeni sənaye klasterləri şəbəkəsi – nəhəng, müasir sənaye parkları yaradılıb. Sumqayıtın 70 illik yubiley tədbirində Prezident İlham Əliyevin dediyi kimi, şəhər bugünkü çağırışlara cavab verən, Cənubi Qafqazın ikinci sənaye mərkəzi kimi təmərküzləşib.
SOCAR-ın tərkibində olan "Azərikimya” İB-nin şəhərin inkişafına öz töhfəsini verdiyini bildirən O.Niftəliyev deyib: "Biz çox sevinirik ki, ulu öndər Heydər Əliyevin Sumqayıta göstərdiyi diqqət və qayğı dövlətimizin başçısı tərəfindən uğurla davam etdirilir. Prezidentimizin 15 ildə Sumqayıta 24 dəfə səfər etməsi və bu səfərlərin təməlqoymalar və açılış mərasimləri ilə müşayiət olunması dediklərimizin sübutudur. Sumqayıtda yeni, dünya standartlarına uyğun istehsal sahələrinin yaradılması, kimya sənaye parklarının inşa olunması, şəhərdə aparılan abadlıq və quruculuq işləri, yeni iş yerlərinin açılması, əməkçilərin iş şəraitinin, sosial rifah halının yaxşılaşdırılması, şəhərin ekologiyasının saflaşdırılması, insanların asudə vaxtlarının və istirahətlərinin səmərəli təşkili bunu deməyə əsas verir ki, Sumqayıt yeni üfüqlərə doğru inamla addımlayır”.
Xəbərdən istifadə edərkən istinad etmək vacibdir.
