Bu gün Sumqayıtda Heydər Əliyev Mərkəzində mərhum prezident Heydər Əliyevin anım gününə həsr olunmuş dəyirmi masa keçirilib. Xeberle.com-a verilən məlumata görə, şəhər icra hakimiyyətinin və Gənclər və İdman Baş İdarəsinin təşkilatçılığı ilə keçirilən "Heydər Əliyev müstəqil Azərbaycanın qurucusudur!” adlı dəyirmi masada tədbir iştirakçıları öncə Mərkəzin hazırladığı "Ümummilli Lider” adlı sənədli filmi seyr ediblər.

İcra Hakimiyyəti başçısının müavini Elgin Həbibullayev çıxış edərək Heydər Əliyevin xilaskarlıq missiyasından, onun əsasını qoyduğu müdrik siyasi kursun bu gün İlham Əliyev tərəfindən uğurla davam və inkişaf etdirilməsindən bəhs edib. O, bənzərsiz tarixi şəxsiyyət Heydər Əliyevə həsr edilmiş tədbirlərin keçirilməsinin gənclərin vətənpərvərlik və vətəndaşlıq tərbiyəsi baxımından mühüm əhəmiyyət kəsb etdiyini diqqətə çatdırıb.

Gənclər və İdman Baş İdarəsinin rəisi Elşən Baxşəliyev, Heydər Əliyev Mərkəzinin direktoru Aygün Zülfüqarlı, Yeni Azərbaycan Partiyası Sumqayıt şəhər təşkilatı İdarə Heyətinin üzvü Ceyhun Məmmədov, Sumqayıt şəhər Gigiyena və Epidimiologiya Mərkəzinin həkimi Səbinə Təhməzli, ”ASAN könüllüləri Gənclər Təşkilatı” İctimai Birliyinin İdarə Heyətinin üzvü Rəşad Məmmədov isə çıxışlarında Heydər Əliyevin böyük siyasi və dövlət xadimi olduğu, öz həyatını və siyasi fəaliyyətini həmişə vətəninə və xalqına həsr etməsi, onun təşəbbüsü və bilavasitə rəhbərliyi altında ölkənin bütün sahələrində görülmüş işlərdən söhbət açıblar.