"Noyabrın 15-dən etibarən payız-qış mövsümünün başlanması ilə əlaqədar ölkədə yaşayış binalarına və sosial obyektlərə istilik verilməli idi. Lakin "Azəristiliktəchizat"la "Azəriqaz" İstehsalat Birliyi arasında yaranan problem istilik təchizatının gecikməsinə səbəb olub".
Bunu Xeberle.com-a açıqlamasında "Azəristiliktəchizat" ASC-nin "Sumqayıtistiliktəchizat" İdarəsinin Abonent və Müştəri Xidmətinin rəisi Binəli Əliyev deyib.
Onun sözlərinə görə, bütün qazanxanalar işlək vəziyyətdədir. Sadəcə, "Azəriqaz”-la "Azəristiliktəchizat" arasında hər zaman qazın verilişi ilə əlaqəli problemlər yaranır. "Azəriqaz” hər zaman ki, kimi mövsümün başlanğıcında yenidən problemləri gündəmə gətirib. İdarələrarası borc məsələsinə gəldikdə isə, bu, idarələr arası hər zaman olan problemlərdəndir.
Hazırda məsələyə baxılmaqdadır. Danışıqlar davam etdirilir, hökumətdə də bu məsələyə baxılır. Qısa zamanda binaların istiliklə təminatı tam olaraq ödəniləcək".
Məlumat üçün bildirək ki, Sumqayıt şəhərində ümumi olaraq 24 qazanxana fəaliyyət göstərir və bu il təxminən 10 min abonentin mənzilinin istiliklə təmin olunması nəzərdə tutulub.
Xədicə Səxavətqızı
Xəbərdən istifadə edərkən istinad etmək vacibdir.
