"Təmsil etdiyim Sumqayıt şəhəri ilə bağlı bir məsələyə toxunardım. Mövsüm hər bir şəhər və rayonda istilik sistemlərinin yenilənməsini, bu sahədə təmir-bərpa işlərinin aparılmasını aktuallaşdırıb və bu sosial-iqtisadi məsələnin həlli olduqca vacibdir. Təbii ki, insanların komfortlu yaşayışının təmin olunması yolunda hər zaman ciddi addımlar atılır. Lakin havaların soyuması ilə aktuallaşan məsələlərdən biri çoxmənzilli binaların istilik təchizatı ilə bağlıdır".
Xeberle.com bunu Milli Məclisin plenar iclasında 2021-ci ilin dövlət büdcəsi layihəsinin müzakirəsi zamanı çıxış edən deputat Emin Hacıyev bildirib. Deputat istilik məsləsinin Sumqayıt şəhəri üçün aktual məsələlərdən biri olduğunu iclas iştirakçılarının diqqətinə çatdırıb: "Mən əvvəlki çıxışlarım zamanı bir dəfə bu məsələni qaldırmışam və keçən iclasımızda hörmətli Hicran xanım Hüseynova da bu məsələyə toxundu. Sumqayıt şəhəri üçün bu məsələ olduqca aktualdır, bu səbəbdən hörmətli hökumət üzvlərini, aidiyyəti dövlət qurumlarının diqqətini bu məsələnin həllinə cəlb etmək istərdim".
E. Hacıyev qeyd edib ki, Regionların İnkişafı üzrə Dövlət Proqramında Sumqayıt şəhərindəki binaların istilik təchizatı məsələsi öz əksini tapıb: "Düşünürəm ki, bu məsələdə dövlətimizin xərclərini azaltmaq məqsədilə istilik təchizatı sahəsini özəlləşdirmək və yaxud da yerli və ya xarici sahibkar və investorların idarəçiliyinə vermək imkanının qiymətləndirilməsi məqsədə uyğun olardı. Təbii ki, süni qiymət artımı kimi problemlər meydana çıxmasın deyə bu sahədə qiymətə təsir mexanizmini dövlətin nəzarətində saxlamaq şərtilə”.
Xəbərdən istifadə edərkən istinad etmək vacibdir.
