Sonuncu dəfə nə vaxt avtobusa mindiyimi, düzü, xatırlamıram. Yaxın günlərdə şəhər nəqliyyatından istifadə etmək məcburiyyətində qaldım. Avtobusa minəndə sürücü soruşdu ki, kartınız var dedim, xeyr. Dedi ki, kartsız getmək mümkün deyil. Düşüb taksi ilə evə getdim.
Son vaxtlar evdə də avtobus kartı ilə bağlı söhbətlər getdiyindən düşündüm gedim bir kart alım evdə olsun. Bir dayanacaqdakı köşkdən kart soruşdum dedilər yalnız poçtlarda satılır. Sumqayıt şəhər poçt şöbələrindən birinə yaxınlaşdım. Pandemiya şəraitinə baxmayaraq kifayət qədər çox insanın növbə gözlədiyinə şahid oldum. Bir az dayanıb mənzərəni seyr etdikdən sonar gördüm bir kassada xanım xidmət göstərmir, öz işi ilə məşğuldur (bəlkə də öz xidməti işi ilə). Sakitcə pəncərəyə yaxınlaşıb soruşdum ki, niyə belə çox növbə var? Dedi çox adam avtobus kartı alır. Dedim niyə bu kartı burda satırlar? Cavab verdi ki, mən onu bilmirəm. Bir nəfərin kart alma vaxtını izlədim və başa düşdüm ki, 2 saat ən azı burda növbə gözləməliyəm. Sonra gördüm ki, bir nəfər mübahisə edir ki, 2 saatdı gözləyirəm, indi mən sənə şəxsiyyət vəsiqəsini hardan alım verim mənə kart verin. Başa düşdüm şəxsiyyət vəsiqəsiz nəqliyyat üçün gediş-gəliş kartı verilmir. Mənim də şəxsiyyət vəsiqəm üstümdə yox idi. Şöbə müdirini çağırmalarını xahiş etdim. Gəldi, salamlaşdıq. Dedim bu nə xidmətdir, niyə insanlar bu qədər növbədə durmalıdır?! Dedi, get onu bizim baş idarədən soruş, bu yaxınlarda 14 işçidən 8 nəfəri ixtisara salındı. Dedim, bu ixtisarla yəqin maaşınızı artırıblar. Bildirdi ki, xeyr, xidmətçi də, müdir də, hamı 231 manat maaş alır. Dedim, insanların rahat alması üçün bu kartlar niyə köşklərə paylanmır?! Cavab verdi ki, kartın sifarişçisi Azərpoçt olduğundan özü də satır.
Sual verdim, məgər sifarişçi Azərpoct olanda nə olar, başqası onu sata bilməz?! Söylədi ki, xeyr,biz onu deydiyyata salırıq. Dedim nə mənası var o qeydiyyatın?!
Dedi: bir adam 2-sini ala bilməsin. Dedim, bu nə məntiqdir?!
Dedi: bizə belə göstəriş verilib.
Sonda bildirdim ki, çox sağ ol, ancaq siz rəhbərliyə çatdırın ki, bu məsələ düz həll edilməyib. Bu insanların hüquqlarının pozulmasına xidmət edir bir kart nədir ki, onun üzərində də monopoliya yaradırlar?!
Bunu ictimailəşdirməkdə məqsədim odur ki, bu məsələ düz həll olunmayıb. Sabah biri kartını itirsə, nə olacaq, o qeydiyyata alınıbsa ona ikinci kartı da verməyəcəklər. Bir maraqlı məqamda odur ki, bu karta pulları da Azərpoçt şöbələrində yükləmək lazımdır. Bu insanlar bir karta görə nə qədər növbələrdə durmalıdır?! Bunun adı nədir?!
Sahib Fərzəliyev
Xeberle.com
P.S. Azərpoçtun saytından:"Hər bir poçt xidmətinin əsas missiyası insanları bir-birinə daha da yaxınlaşdırmaq və doğmalaşdırmaq, təkrarolunmaz hisslər doğurmaq və onlara unudulmaz anlar bəxş etməkdir”
Xəbərdən istifadə edərkən istinad etmək vacibdir.
