Sumqayıt şəhər "Kimyaçılar" yaşayış massivinin "TES 1" adlanan ərazisində yaşayan sakinlər təhlükə ilə üz-üzədir.
Bu barədə
Xeberle.com-a həmin ərazidə yaşayan sakinlər məlumat verib. Bildiriblər ki, ərazidə Cəbrayıl rayon 6 saylı orta ümumtəhsil məktəbi yerləşir: "Yaşadığımız ərazidə bir neçə gün bundan öncə müşahidə olunan güclü külək səbəbindən elektrik dirəyi qəzalı vəziyyətə düşüb. Hər an aşma təhlükəsi var".
Şikayətçilər deyirlər ki, üstəlik işıq dirəyi məktəbin yaxınlığında yerləşir: "50 metr yaxınlıqdadır. Gün ərzində buradan keçərək uşaqlar məktəbə gedir. Dəfələrlə Sumqayıt Elektrik Şəbəkəsinə müraciət etsək də problemə əncam çəkən yoxdur. Şəbəkənin əraziyə məsul olan əməkdaşına da bu barədə məlumat verilib. Amma nə fayda? Elə deyirlər ki, baxarıq. Bir daha güclü külək olsa dirək aşacaq, naqillər artıq boşalıb, sallanır.
Nə vaxt baxacaqlar? Faciə yaşanandan sonra?"
Mövcud problemlə bağlı Sumqayıt Elektrik Şəbəkəsi ilə əlaqə saxladıq. Qurumdan bildirildi ki, sabah problemə yerində baxıb həll edilməsi üçün əraziyə işçi briqadası göndəriləcək.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
