Sumqayıtda vətəndaşa məxsus fərdi yaşayış evinə bitişik yarım tikilidə yanğın hadisəsi baş verib. Güclü yanğın şəhərin 25 -ci məhəlləsində qeydə alınıb. Hadisə yerinə FHN-nin Sumqayıt Yanğından Mühafizə xidmətinin 3 yanğın söndürən maşını və canlı qüvvəsi, həmçinin təcili tibbi yardım cəlb olunub. Araşdırma zamanı məlum olub ki, vətəndaş Əzizə Ağayevaya məxsus 40 kvadrat metrlik yarım tikili içindəki əşyaları ilə birlikdə yanıb. FHN-nin Sumqayıt Yanğından Mühafizə xidmətindən Xeberle.com-a verilən məlumata görə, yanğın həmin yarım tikiliyə bitişik digər yaşayış evinədə keçib. 80 kvadrat metrlik həmin evin dam örtüyü də yanıb. Yanğın söndürənlərin sayıqlığı nəticəsində alovun qarşısı tez bir zamanda alınıb.  Evin qalan hissəsi yanğından mühafizə olunub. Şahidlərin verdiyi məlumata görə, yanğın ani bir vaxtda baş verib. Hadisənin dəqiq baş vermə səbəbləri aparılan araşdırmalardan sonra məlum olacaq.
Xeberle.com