Sumqayıtda istifadə üçün yararsız dayanacaqlar məsələsi sakinləri narahat edir.
Bunlardan biri də Səməd Vurğun küçəsi, Xəzri yaşayış massivində təhlükə mənbəyinə çevrilən dayanacaqdır. Bu haqda yaşayış massivinin sakinləri tərəfindən Xeberle.com-a məlumat daxil olub. Taxta parçalarından tikilən dayanacaq əsl təhlükə mənbəyinə çevrilib. Bundan əlavə, gözləmə məntəqəsinin içi zibillə doludur. Sakinlər deyirlər ki, ərazidə yeni dayanacaqların olmaması səbəbindən bundan istifadə etməyə məcburdurlar.
"Payızda, qışda soyuqdan, yayda, yazda isə günəşdən qorunmaq üçün illərdir bu dayanacaqdan istifadə edirik. Lakin o, artıq köhnədir. Biz də istəyirik buraya yeni, müasir dayanacaqlar quraşdırılsın”, – deyə sakinlərdən biri istəyini söyləyib.
Məsələ ilə bağlı Sumqayıt şəhər İcra hakimiyyəti başçısının 1 nömrəli sahə inzibati ərazi dairəsi üzrə nümayəndəliyi ilə əlaqə saxladıq.
Nümayəndəliklən Xeberle.com -a dayanacağın vəziyyətindən xəbərdar olduqlarını bildiriblər. Qeyd olunub ki, yaxın vaxtlarda dayanacaq yenilənəcək.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
