Qeyd edək ki, bahalaşma barədə ADY-nin rəsmi saytındakı Tarif Cədvəlində heç bir yenilənmə əks olunmayıb.

Məsələ ilə bağlı Azərbaycan Dəmir Yolları (ADY) ilə əlaqə saxladıq. Qurumun mətbuat xidmətindən Xeberle.com-a bildirilib ki, sərnişindaşımada xidmət keyfiyyətini artırmaq və əlavə dəyər yaratmaq məqsədilə bir sıra yeniliklər təqdim edir: "Şirkət müştəri məmnuniyyətini yüksəltmək üçün 23 sentyabr 2024-cü il tarixindən loyallıq proqramının tətbiqinə başlayıb. Bu proqram şəhərətrafı qatarlarla səfər edən sərnişinlərə "ADY Mobile” tətbiqi vasitəsilə daha sərfəli və rahat səyahət imkanları yaradır, gedişlər üzrə 3% keşbek və qeydiyyat, dostun dəvət edilməsi, sorğularda iştirak və qiymətləndirmələr zamanı bonus qazandırır. Loyallıq proqramı 1 həftə test rejimində fəaliyyət göstərəcək. ADY, həmçinin 1 noyabr tarixindən ölkədaxili marşrutlar üzrə dinamik qiymət siyasətinə keçir. Yeni qiymət siyasətinə əsasən, bilet qiymətləri tələbdən asılı olaraq dəyişə biləcək. Bilet satış sisteminə inteqrasiya edilmiş qabaqcıl texnologiyalar sayəsində sərnişinlərə real vaxtda qiymətləri izləmək və ən uyğun səyahət vaxtını seçmək imkanı yaradılır. Artıq səfərə 30-25 gün qalmış və əks istiqamətdə oturacağa bilet almış sərnişinlər 15% endirimdən yararlana biləcəklər. 

ADY-nin Sərnişin daşımaları departamentinin rəisi Azər Fərəcov bildirib ki, yeni dinamik qiymət siyasəti müştərilərə daha geniş seçim verir: "Dünya təcrübəsinə nəzər salsaq, Rusiya Dəmir Yolları yüksək tələbatlı marşrutlar üzrə dinamik qiymətqoyma strategiyasından istifadə edir, Belarus Dəmir Yollarında rezervasiyalar və qeyri-pik vaxtlarda endirimlər təklif olunur,  Avropa ölkələrinin bir çoxunda isə biletin alındığı müddət, doluluq faizi, yer seçiminə görə qiymətlər dəyişir. Artıq ADY sərnişinləri də ölkədaxili istiqamətlərdə səyahətlərini öncədən planlaşdırmaqla endirimli qiymətlər əldə edə bilərlər. Qiymətlər alış tarixinə, həftənin gününə, bayramlara və oturacaq istiqamətinə görə müəyyən edilir. Bu dinamik tarif modeli erkən bilet alan sərnişinləri mükafatlandırır, həmçinin öncədən əlavə qatarların (reyslərin) təyin edilməsi baxımından ADY üçün planlaşdırma imkanları yaradır”.

Bəs, qiymətlərin "bu siyasətlə" artırılması nə dərəcədə düzgündür?

Mövzu ilə bağlı iqtisadçı-ekpert Elçin Rəşidovla həmsöhbət olduq. O qeyd edib ki, "Azərbaycan Dəmir Yolları" Qapalı Səhmdar Cəmiyyəti öz xərclərini qarşılamır: "Qurum ciddi şəkildə subsidyalaşır. Həm investisiya xərclərində, həm də əməliyyat xərclərində. Xərclərinin qarşılanması üçün iki yolu var. Birincisi maliyyə xərclərində şəffaflıq artırılmalıdır. Hazırda qeyri-şəffaflıqıdır. İkincisi səmərəlilik artırılmalıdır. Bunları etmədikləri üçün biletlərin qiymətlərini artırırlar ki, xərclərini qarşılasınlar. Bu eyni zamanda, digər qurumlara da aid edilir. Belə olmadığı təqdirdə iqtisadiyyat da geriləyir”.

Nəqliyyat eksperti Eldəniz Cəfərov isə açıqlamasında, dinamik qiymət siyasətinin Türkiyə və Gürcüstanda xeyli müddətdir tətbiq olunduğunu bildirib: "Dinamik qiymət siyasəti bir çox ölkələrdə çoxdandır var. Türkiyə və Gürcüstanda bu siyasət tətbiq olunur. Burda fərqləndirən cəhət ondan ibarətdir ki, sərnişin əvvəldən nə qədər tez bilet sifariş edirsə, o zaman o bileti daha ucuz əldə edir. Səfərinə az qalmış bilet sifariş edən vətəndaş üçün qiymət bir qədər fərqli olur. ADY mobil tətbiq vasitəsilə bilet sifariş edən sərnişinlərə də güzəşt tətbiq edir. Bunu qiymət yüksəlməsi yox, qiymət dəyişməsi kimi də adlandıra bilərik. Çünki, qiymət dəyişir. Daha tez bilet sifariş edən və daim müştərilərinə endirimlər də nəzərdə tutulur. Amma, qiymət dəyişikliyi olursa, əhalinin bütün təbəqələri nəzərə alınmalıdır. Xüsusilə, aztəminatlı insanlar, əlilliyi olan insanlar, hərbçilər və tələbələr. Ümid edirəm ki, yeni tədbiqdə bunlar nəzərə alınacaq”.