Ötən həftə sonu Qərbi Kaspi Universitetinin təşkilatçılığı və "ASAN kadr” Karyera Mərkəzinin təşkilati dəstəyi ilə Əmək Yarmarkası keçirilib.
BakuPost-un əməkdaşı Əmək Yarmarkasında iştirak edib, işəgötürənlər və iş axtaranlarla söhbət edib.
Qərbi Kaspi Universitetinin İnnovasiya Şöbəsinin rəhbəri Rauf Həsənov bildirib ki, yarmarkaya SOCAR, "Holcim”, "Təmiz Şəhər” ASC, "Schlumberger Logelko”, Gilan Holding, "Azərsun", Ata Holding, "Bakcell”, "Azercell” kimi şirkətlərlə yanaşı aparacı banklar, sığorta və turizm şirkətləri, ümumilikdə 50-dək şirkət qatılaraq vakansiya və tələbələr üçün təcrübə proqramlarını təqdim ediblər.
Sərgi iş axtaranlarla işəgötürənlərin əlaqələndirilməsi, eləcə də tələbələrin yeni təcrübə proqramları barədə informasiyalar əldə etməsi baxımdan əhəmiyyətlidir.
"Bakcell” şirkətinin İnsan Resursları Departamentinin əməkdaşı Elnarə Verdiyeva bildirir ki, onlara yarmarkada 200-dək gənc yaxınlaşaraq iş və təcrübə imkanları ilə maraqlanıblar: "Onlardan bəziləri CV-lərini təqdim etdilər, bəzilərini iş müsahibəsində iştiraka dəvət etdik. Şirkətimizdə satış və marketinq şöbəsində vakansiyalarımız var. Hesab edirəm ki, bu tədbir tələbələr, gənclər üçün faydalı olacaq”.
"Atəşgah sığorta” şirkətinin əməkdaşı Səidə Qurbanova deyir ki, tələbələr xüsusilə təcrübə proqramları ilə maraqlanırlar: "Hazırda bir neçə vakansiyamız var. Maraqlananlar çoxdur. Vakansiyalarımızda təcrübə tələb olunmur. Potensialı olan gəncləri cəlb etməkdə maraqlıyıq”.
Qərbi Kaspi Universitetinin tələbəsi Yadigar Nağıyev bildirib ki, şirkətlərdən bir neçəsinə təcrübə proqramı üçün müraciət edib: "Universitetimiz bizə təcrübə proqramlarına qoşulmaq üçün müxtəlif imkanlar yaradır. Bugünkü yarmarka bu imkanlardan biridir. Üç şirkətə təcrübə proqramı üçün müraciət etmişəm. Əgər hər üçündən dəvət gəlsə, sonra seçim edərəm. İnanıram ki, təcrübə proqramında özümü doğruldacam, daha sonra iş təklifi də alacağam”.
Sərgiyə başqa universitetin tələbələri, məzunları da qatılmışdılar.
Bakı Dövlət Universitetinin ötənilki məzunu Əli Süleymanov bir neçə şirkətin vakansyiyaları ilə tanış olub: "10-dan artıq şirkətin vakansiyası ilə tanış oldum. "Holcim”, "Azercell” və Sumqayıt Sənaye Parkına CV təqdim etdim. Ümid edirəm, nəsə alınacaq”.
Qərbi Kaspi Universitetinin rektoru Andris Leitas bütün şirkətlərin masalarına yaxınlaşaraq, onları salamlayıb, yarmarkada uğurlar arzu edib.
Yarmarka gənclərin şirkətlərin tələb etdiyi kompitensiyalar barədə məlumatlar alması, işəgötürənlərin İnsan Resursları Departamentlərinin əməkdaşları ilə birbaşa təması baxımından da əhəmiyyətli olub.
Təbii ki, yarmarka yalnız gənclər üçün deyildi. 44 yaşlı Vahid Axundov deyir ki, iş üçün burada bir neçə şirkətə müraciət edib: "Bank, mühasibatlıq sahəsində təcrübəm var. Bir neçə banka və sığorta şirkətlərinə müraciət etdim. CV-ni qəbul etdilər, ümid edirəm, əlaqə saxlayacaqlar”.
Qərbi Kaspi Universitetinin məzunu olmuş Lamiyə Niftiyeva isə əmindir ki, o, burada iş tapıb: "İş üçün şirkətlərdən birinə müraciət etdim. HR buarada olduğundan elə buradaca müsahibə təşkil edildi. Xarici dil bilikləri filan tələb olunurdu. Mənim də IELTS sertifikatım var, özümlə götürmüşdüm, müsahibənin bir hissəsi də ingiliscə oldu. Dedilər ki, müraciət etdiyim vakansiyaya tam uyğun gəlirəm, növbəti həftə məni rəhbərliklə görüşdürəcəklər”.
Xəbərdən istifadə edərkən istinad etmək vacibdir.