Orta məktəbi bitirənlərin əksəriyyəti, ali məktəbə daxil olmaq istəyir. Bir vaxtlar hüquq fakültəsində təhsil almaq sanki dəbə çevrilmişdi. Hüquqşünas olmaq istəyən də, istəməyən də bu fakültəni seçirdi. Sonra İqtisad Universitetində təhsil almaq sanki səviyyə göstəricisinə çevrildi. Beləcə, əksəriyyət eyni ixtisas üzrə təhsil alsa da iş tapa bilmədi. Elə qəhrəmanım Aynur Davudova kimi. 2 ali təhsili olan bu xanım normal gəlir əldə etmək üçün indi aşpazlıq sənətinə yiyələnir. Düşünür ki, aşpazlıq ona oxuduğu ixtisaslar üzrə işləməkdən daha çox gəlir gətirəcək. Tələbatı nəzərə alaraq və qazancı fikirləşərək Aynur Davudova kimi aşpaz olmaq istəyənlərin sayı hazırda kifayət qədərdir. Bu sənətin incəliklərini öyrənənlər isə təkcə xanımlar deyil. Azərbaycanda turizm, o cümlədən restoran biznesinin inkişaf etdiyi bir vaxtda əmək bazarında aşpazlara tələbat artığından onların maaşları da yüksəkdir. 2017-ci ilə qədər üstünlük verilən digər peşələr daha çox kompüter və mühasibatlıq olub. Peşə təhsili üzrə dövlət agentliyinin direktoru Famil Mustafayevin sözlərinə görə, hazırda nisbətən daha çox gəlir gətirən sahələr kömpyüter bilikləri -  İT və bərbərlikdir.Azərbaycanda kənd təsərrüfatı sahəsi üzrə ixtisaslı kadrlara ehtiyac olsa da belə peşə sahiblərini tapmaq çətindir. Buna baxmayaraq bölgələrdən Bakıya gələnlərin əksəriyyəti tikinti sahəsində işləmək istəyir. İş axtaranların təxminən  hər 10 nəfərdən 3-ü bu sahəyə maraq göstərir. Mütəxəssislər bildirirlər ki, ixtisas seçərkən bəzi nüanslara diqqət yetirib, tələbatı da nəzərə almaq lazımdır. Lakin hər kəs bacardığı işlə məşğul olmalıdır.  Qəhrəmanım Aynur Davudova da "sənətin pisi olmaz, sənətkarın pisi olar” deyərək tövsiyələrini unutmadı.Beləcə,məsləhət görülür ki, ətrafdakıların tövsiyələrindən çox, hansı sahəyə marağınız varsa o ixtisasa yiyələnin. Yaxşı sənərkar olsaz, siz işi yox, iş sizi tapacaq.