Ramil Süleymanov: "Anar Bağırov və onun kimi insanlar fikirləşməsinlər ki...”
Bu ilin yanvarında Vəkillər Kollegiyasına keçirilən test imtahanından 63 bal yığaraq, ikinci tura keçən hüquqşünas Ramil Süleymanov bu mərhələni keçə bilməyib. Müsahibə formasında olan ikinci turu adlaya bilməyən hüquqşünas Vəkillər Kollegiyasının rəhbərliyindən narazıdır.
O, iddia edir ki, məqsədli şəkildə onun kollegiyaya üzvlüyünün qarşısı alınıb. Bununla bağlı "Yeni Müsavat”a müraciət edən R.Süleymanov Vəkillər Kollegiyasının rəhbəri Anar Bağırov və digərlərinin ünvanına ağır ittihamlar səsləndirdi: "Vəkillik sahəsi həmişə müstəqil olub, kimsədən asılı olmayıb, standart iş qrafikinə malik deyil, ən əsası, azaddır. Hesabatlılığı yalnız müştərisinədir, hansısa məmura, vəzifəli şəxsə deyil. Mən də təbiətcə müstəqiləm, kimsədən asılılığı sevməmişəm, həmişə standart iş qrafiklərindən sıxılmışam və daima ruhum azad olub!
Heç bir zaman nə dövlət qulluğunda, nə prokurorluq orqanlarında, nə də digər sahələrin imtahanlarına hazırlaşmamışam. Uzun zamandan sonra, nəhayət, vəkilliyə imtahan elan edildi. Sevincli şəkildə sənədlərimi topladım və kollegiyaya təqdim etdim. İmtahan keçirilənədək həqiqətən uzun zaman keçdi. Yeni rəhbərlik gəldi. İmtahana qədər müsahibələr, şəkillər, bəyanatlar vəkilliyə namizədlərdə son dərəcə əminlik yaratmışdı ki, hamı keçəcək. Çünki söz verilmişdi ki, 60% suallar çox asan olacaq. Amma nəticə nə oldu? 60% suallar çox çətin oldu. Biabırçı nəticə əldə olundu və təxminən 2000 nəfərin 607 nəfəri keçdi. Bundan sonra imtahan suallarının ağırlığı, çətinliyi müzakirə mövzusu olduqda gənc rəyasət heyəti sədrini bəzi deputatlar müdafiə etməyə başladılar ki, hüquqşünas 60 bal toplaya bilmirsə, getsin diplomunu cırsın. Mən diplom cıranlardan olmadım. 63 balla ikinci mərhələyə keçdim. İxtisas komissiyası 11 nəfərdən ibarətdir. Bu komissiyanın əvvəlki illərdən fərqli cəhəti o idi ki, hər kəs disiplinli olaraq həftənin 3 günü Vəkillər Kollegiyasının əsas binasına gələrək imtahan götürürdülər. İnsafən, deyim ki, sadə və cavab verilə bilinəcək suallar idi. Hər bir namizəd demək olar ki, eyni sözləri deyirdi ki, komissiya üzvləri yaxşı yanaşırdı, bilmədikləri sualları yönəldici suallar verməklə çalışırdılar ki, hüquqşünas cavab versin. Bütün bunlar məndə haradasa pozitivlik yaratmışdı.
Amma yenə də işimi ehmallı tutmaq üçün Vəkillər Kollegiyasının rəhbərliyi, şəxsən sədr Anar Bağırovla birbaşa görüşmək qərarına gəldim. 2015-ci ildə deputatlığa namizədliyim REAL Hərəkatı tərəfindən dəstəkləndiyi üçün bunun karyerama müəyyən təsirlərinin, o cümlədən, facebook sosial şəbəkəsində bəzi haqsızlıqlara birbaşa reaksiya göstərmələrim, eləcə də Praktik Hüquqşünaslar qrupunun üzvlərindən biri kimi ölkədə nümayəndəlik institutunun ləğvinə yönəlmiş qanun layihəsinə açıq və fəal şəkildə etirazımı bildirməyimin hakim komanda və onun yerlərdəki "nümayəndələri” tərəfindən hiddətlə qarşılandığını bilirdim və bu səbəbdən də Anar Bağırovla birbaşa görüşmək istədim. Anar Bağırov xahişimi qəbul etdi və mənimlə görüşdü. Mən ona açıq və konkret şəkildə siyasi fəaliyyətimin olmaması, bununla əlaqədar gələcəkdə də belə fəaliyyətimin olmayacağını, yalnızca vəkillik fəaliyyəti həyata keçirəcəyimi bildirdim. Ona görə də mənə şifahi mərhələdə süni əngəl yaradılmamasını xahiş etdim. Yazılmayan oyun qaydaları bunu tələb edirdi. Anar müəllimdən bunu xahiş etdikdə o son dərəcə istehzalı şəkildə, özündən razı formada elə danışdı ki, elə bil, adam öldürmüşəm və basdırmaq üçün onun bağındakı ağaclarının yanından torpaq sahəsi istəyirəm . O, bir müddət işçisi olduğum, hörmət etdiyim, vəkil Muxtar Mustafayevin məni nədən işdən çıxardığını soruşdu. Açıq şəkildə dedim ki, REAL-a görə işdən çıxardıb məni, amma REAL-da nəzərə çarpacaq bir fəaliyyətim olmayıb. Bundan sonra bitərəf vəkil kimi işimlə məşğul olacağımı dedim. Anar Bağırov uzun danışıqdan sonra məndən bu məsələdə Muxtar müəllimlə görüşməyimi və ondan razılıq və onun zəmanət almağımı məsləhət gördü. Yalnız bundan sonra məsələ öz həllini tapa bilərdi”.
Hüquqşünas M.Mustafayevin də ünvanına sərt danışdı: "Muxtar müəllimlə görüşdüm və ona təminat verərək bildirdim ki, onsuz da siyasi fəaliyyətimhə heç vaxt olmayıb, yalnız 2015-ci ildə Milli Məclisə seçkilərdə namizəd olduğumu bildirdim. O isə guya mitinqlərdə iştirak etdiyimi, kəskin bəyanatlar verdiyimi və Avropa Şurası ilə əlaqələrimin olduğunu dedi. Cavabda Avropa Şurasının Avropa İnsan Haqları Konvensiyası üzrə təlimçisi olduğumu və bunun ölkənin hər hüquqşünasının bacarmadığını dedim və eyni zamanda Vəkillər Kollegiyasının Rəyasət Heyətində, o cümlədən, digər İntizam və İxtisas komissiyalarında da Avropa Şurasının təlimçisi olan şəxslərin olduğunu dedim. Mitinqdə iştirak etməyimi sübut edəcək hər hansı bir faktın olmadığını əminliklə dedim. Bundan sonra Muxtar müəllimlə kişi sözü danışdım və vəkil olacağım təqdirdə hər hansı bir siyasi fəaliyyətimin olmayacağını dedim. O da mənə kişi sözü verdi ki, o, mənə zamin durub və söz verib. Təxmini 1 il Sumqayıt şəhərində işləyəndən sonra, əgər onun vəziyyətinin yaxşı olacağı təqdirdə özünün rəhbərlik etdiyi vəkil bürosuna gətiriləcəyimi dedi. Bu söhbətdən sonra məndə müəyyən mənada rahatlıq yarandı.
Aprelin 29-da şifahi imtahana çağırıldım. Şifahi imtahana məndən öncə girənlərlə söhbət 8-10-12, maksimum 15 dəqiqə müddətində davam edirdi. Lakin mənim imtahanım 23 dəqiqəyə yaxın çəkdi və sanki "düşmən əsgəri” hədəf taxtasına qoyulmuşdu. Yalnız 1 suala cavab vermədim. Digər 4 sualdan 3-nə yaxşı, 1-nə isə kafi cavab verdim. Ümumi şəkildə götürsək suallar çox ağır idi və həmin günə qədər ən çətin sualların bizə düşməsinə baxmayaraq, haradasa 60-70% suallara cavab verdim. İmtahandan çıxandan sonra 12 nəfərlik heyətdən 5 nəfərini tanıdığım üçün onlara zəng etdim və imtahan sualları ilə bağlı nəticələri müzakirə etdik. Hər biri suallara pis cavab verdiklərini və sualların çox çətin olduğunu bildirdi. Mən isə sualları qeyd etdiyim kimi normal cavab vermişdim, pozitiv idim və əmin idim ki, adım siyahıda çıxacaq. Amma adım siyahıda çıxmadı və ikinci turdan kəsildim. 94 nəfər ikinci tura girmiş şəxsdən 86 nəfər ikinci mərhələdən keçmişdi. 8 nəfər isə kəsilmişdi. Kəsilən 8 nəfərdən 2 nəfər isə mənimlə birlikdə həmin gün imtahan vermiş vəkil Əsabəli Mustafayevin oğlu Ruslan Mustafayev idi. Yəni, həmin gün çağırılan 12 nəfərdən 10 nəfər keçmiş, mənimlə Ruslan Mustafayev kəsilmişdi. Məsələnin artıq gün kimi aydın olduğu ortada idi.
Odur ki, Vəkillər Kollegiyasının rəhbərliyi ilə görüşüb, sözünü deyib imtahan nəticələrindən şikayət vermək qərarına gəldim. Aprelin 20-də Anar Bağırov, Fərhad Nəcəfov və Aydın Axundovdan ibarət heyətlə görüşdüm. Anar Bağırovdan nədən imtahandan keçirilmədiyimi soruşduqda o, mənim ixtisas komissiyasının rəyi əsasında kəsildiyimi və normal cavablar vermədiyimi dedi. Belə olan təqdirdə bunun həqiqət olmadığını, sırf zamanında olmuş siyasi fəaliyyətimə və praktik hüquqşünaslar qrupundakı fəaliyyətimə görə keçirilmədiyimi onun diqqətinə çatdırdım. Eyni zamanda mənimlə kişi söhbəti olduğunu və ikinci turdan keçiriləcəyimə dair zəmanət alındığını dedim. Anar Bağırov isə hiddətlə belə bir söhbətin olmasına rəğmən cavab verməməyimə görə kəsildiyimi deyirdi. 2-ci tur imtahanının düzgün təşkil olunmadığını və əslində bizim testlə akademik imtahan verdiyimizə diqqət çəkib şifahi imtahanın belə olmamalı olduğunu bildirdikdə Anar Bağırov əslində Dövlət İmtahan Mərkəzinin keçirmiş olduğu imtahanın ona maraqlı olmadığını, bunun sadəcə sıradan bir əzbərçilik olduğunu dedi. Mən isə Dövlət İmtahan Mərkəzinin test imtahanında insan faktorunun olmadığını, 2-ci turun isə nəticələrinə onun və onun kimi insanların təsir etdiyini dedikdə uzun mübahisə yarandı. Nəticə etibarilə Anar Bağırov gedib hazırlaşıb 1 ildən sonra gəlməyimi, kəsildiyimi israrla deyirdi. Anar Bağırovla olan görüşün tam stenoqramı məndə var. Bunu onun özünə də təqdim etməyə hazıram. Anar Bağırov və onun kimi insanlar fikirləşməsinlər ki, məni sındıra bildilər. Əslində onlar mənim kimi insanın kişi sözünə güvənərək özlərinin verdikləri sözü çox gülməli şəkildə uddular”.
Yazıda adı keçən şəxslərin, o cümlədən, Vəkillər Kollegiyasının mövqeyini verməyə hazırıq.

Xəbərdən istifadə edərkən istinad etmək vacibdir.