Allah,Vətən, Ana, Ata... Yəni, seçə bilsəydik bəlkə də müqəddəs olmazdılar.

Əgər varsansa deməli yaradılmısan, yaradana - Allaha borclusan. Harda dünyaya göz açmısansa ora sənin üçün Vətəndir. Dünyanı sənə bəxş edən qadın isə sənin anandır. Və nəhayət bu yer üzündə sənin Allahın sənin atandır. Sən ondan güclü, güvənli birini tanımayacaqsan. Həyat istiqamətini ondan alacaqsan. Nahaq yerə deyilməyib ki, ananın südü, atanin isə halallığı övlad üçün mənəvi borcdur. Bütün bu dəyərlər nəinki milli, hətta bəşəridir - yer üzünün canlılarının alisi sayılan insanların Ali qanunlarıdır. Nə xoş halımıza ki, bir xalq olaraq bəşərin bütün ali qanunlarını milli-mənəvi dəyərlərimizə çevirərək xoşbəxt və firavan həyat yaşayırıq. Hələ bu insani dəyərlərə fərqi bir rəng də qatmışıq - Ata vəsiyyəti! Heç bir xalqa mənsub olmayan bu milli rənglər biz azərbaycanlıların həyatında mühüm əhəmiyyət kəsb edir. Belə ki, hər övladın ata vəsiyyətinə əməl etməsi onun mənəvi borcdur... Bu dəyərlər cəmiyyətin kiçik modeli olan azərbaycanlı ailələrində adətən övladlar hələ yeniyetmə ikən aşılanır. Cəmiyyətdə sosial statusundan asılı olmayaraq hər bir azərbaycanlı övlad bu mənəvi borcu ömrünün sonuna qədər həyata keçirmək üçün çalışır.

Həyatda hər bir insanın məqsədi var. Kimisi üçün bu, dünyada fərd olmaq, kimisi üçünsə milli mənəvi dəyərləri yaşadaraq xalqın taleyini aydınlığa çıxaracaq bir şəxsiyyət olmaqdır. Bəlkə də insanları daha çox fərqləndirən bu cəhətdir. Yəni, insanı yönləndirən əsas qüvvə onun inandığı dəyərlərdir. Bu dəyərlər sağlam düşüncəli insana yol göstərir, onun yoluna işıq saçır.

Deyirlər böyük insanların böyük də arzusu, istəyi olur. Məhz Ulu Öndər Heydər Əliyev kimi.... Azərbaycan xalqının qaranlıq taleyini nura çevirən böyük şəxsiyyət Heydər Əliyevin böyük bir arzusu, istəyi də vardı – doğma Qarabağı düşmənlərin işğalından azad etmək, mədəniyyətimizin beşiyi olan Şuşada Azərbaycan bayrağını dalğalandırmaq! Nə yazıq ki, buna ömür vəfa etmədi. Bəli, O, bu arzunu siyasi kursunun layiqli davamçısı, Azərbaycan Respublikasının Prezidenti cənab İlham Əliyevə sağlığında həyata keçməyən arzu olaraq -ATA VƏSİYYƏTİ” kimi əmanət qoyub getdi. Bütün milli-mənəvi dəyərləri layiqincə yaşadan və təbliğ edən İlham Əliyev öz vəzifə borclarına olduğu kimi, ata vəsiyyətinə də bir oğul olaraq çox həssaslıqla yanaşdı... Azərbaycan Respublikasının Prezidenti seçildiyi gündən Qarabağ məsələsinə xüsusi önəm verən İlham Əliyevin peşəkar xarici və daxili siyasətinin nəticəsi olaraq, rəşadətli Azərbaycan ordusu 44 günlük II Qarabağ savaşında düşmənə sarsıdıcı zərbələr endirərək Qarabağı, alınmaz qala-Şuşa şəhərini işğaldan azad etdi. Bəli, 8 NoyabrdaŞuşa işğaldan azad edildi! Şuşanın düşmən işğalından azad olunması bir daha sübut etdi ki, Heydər Əliyev müdrik ata, İlham Əliyev isə onun ideyalarına sadiq bir oğul və bu siyasi kursun layiqli davamçısı, dərin zəkaya və xüsusi bacarığa malik olan bir Prezident, mübariz bir sərkərdədir!

Şuşanın azad olunması bir oğulun atasına və torpağına sevgisinin, onun ata vəsiyyətinin məsuliyyətini hiss etməsinin və öz qanı ilə tarix yazan şəhidlərimizin qəhrəmanlağının nəticəsidir. İnsanı hörmətli, əzəmətli və güclü edən onun söykəndiyi dəyərlərdir. Bu dəyər vətənə, torpağa sevgi, ataya hörmətdirsə, onda insanlıq, əsl mənəviyyat zəfər çalmışdır. Bu tarixi qələbəni cənab Prezident Azərbaycan tarixinin ən şanlı səhifəsini yazan Sərkərdə kimi öncə məhz ümummilli lider Heydər Əliyevin məzarını ziyarət edib, müqəddəss Şəhidlər Xiyabanından xalqa bəyan etdi: Xoşbəxt adamam ki, ata vəsiyyətini yerinə yetirdim. Şuşanı azad etdik!

Arif Vəliyev

Abşeron rayon Mədəniyyət Mərkəzinin direktoru