Bu gün Bakıda Azərbaycan-Polşa biznes forumu keçirilib.
Forumda Azərbaycan-Polşa Hökumətlərarası Komissiyasının həmsədri, Energetika naziri Natiq Əliyev iki ölkə münasibətlərindən danışıb.
O, Azərbaycandan Polşaya nəql olunan xam neftin ixracının ilbəil artdığını deyib: "Azərbaycan Dövlət Neft Şirkətinin törəmə şirkəti olan "SOCAR-Trading” Polşanın "Orleans” şirkətinə 2012-ci ildə 485 min ton, 2013-cü ildə 523 min ton, bu il ərzində isə 750 min tondan artıq xam neft göndərib. Polşa şirkətləri Azərbaycanda dəmir yolları, yeyinti sənayesi, tikinti, enerji və dəmir yolları sahəsinə böyük maraq göstərir və bu sahədə əməkdaşlıq etməkdə maraqlıdırlar. Polşa şirkətlərinin yüksək sənaye təcrübəsi Sumqayıtda tikilməsi nəzərdə tutulan sənaye mərkəzləri və texniki parkların yaradılmasında böyük əhəmiyyət kəsb edə bilər”.
Polşa-Azərbaycan Hökumətlərarası komissiyasının həmsədri, Polşanın baş nazirinin müavini, iqtisadiyyat naziri Yanuş Pexoçinski, Azərbaycanın Polşa üçün olduqca əhəmiyyətli ölkə olduğunu diqqətə çatıdırıb: "Polşa Azərbaycanın sərmayə mühitini daha da yaxşılaşdırmağa və bu sərmayələrin həcminin artırılmasında maraqlıdır. Biz ölkənizdə tikinti, kənd təsərrüfatı, nəqliyyat, logistika, texnologiya, müdafiə sənayesi sahələrində öz təcrübələrimizi bölüşə bilərik. Azərbaycan bizim daxil olmaq istədiyimiz bazarlardan biridir. Bu gün Polşada xarici sərmayələrin həcmi 221 milyard dollar təşkil edir. Azərbaycan şirkətləri ölkəmizə sərmayə yatırmaqla, Avropa Birliyi ölkələri ilə ticarəti daha da genişləndirə bilərlər. Bunun üçün də rəsmi Varşava bütün güzəştləri təqdim etməyə hazırdır. Bizim məqsədimiz iki ölkə arasında iqtisadi əlaqələri daha da genişləndirmək və bu əməkdaşlığı daha da yaxın etməkdir”.
Sonda polşalı nazir Varşavada Polşa İqtisadiyyat Nazirliyində Azərbaycan iqtisadiyyatı haqqında təqdimatının təşkil edilməsini təklif edib. (SalamNews.org)
Xəbərdən istifadə edərkən istinad etmək vacibdir.