Xalqımız, eləcə də dünyanın müxtəlif ölkələrində məskunlaşmış soydaşlarımız, hər il dekabrın 31-ni Dünya Azərbaycanlılarının Həmrəylik Gününü böyük həvəs və coşqu ilə qeyd edir. Bu bayram ildən-ilə daha geniş vüsət alır, daha geniş şəkildə keçirilir. Azərbaycanı özünə tarixi Vətən bilən hər bir şəxsin həmrəylik nümayiş etdirməsi qürurvericidir.
Xeberle.com xəbər verir ki, bu sözləri Milli Məclisin deputatı Səbinə Salmanova deyib.
Deputat bildirib ki, Ulu Öndər Heydər Əliyevin təşəbbüsü ilə 1991-ci il dekabrın 16-da Naxçıvan Muxtar Respublikası Ali Məclisinin iclasında 31 dekabrın Dünya Azərbaycanlılarının Həmrəyliyi Günü kimi qeyd olunması haqqında Qərar qəbul edildi: "Azərbaycan Respublikası Ali Sovetinin Milli Şurası dekabrın 31-nin Dünya Azərbaycanlılarının Həmrəyliyi Günü elan olunması barədə Qanun qəbul etdi. 2001-ci il noyabrın 9-10-da Dünya Azərbaycanlılarının I qurultayı keçirildi. 19 il sonra biz bu tarixin müqəddəsliyini Vətən müharibəsindəki Zəfərimizlə yenidən yaşadıq. Qurultayda dünyanın 36 ölkəsində yaşayan azərbaycanlıları təmsil edən 200-dən çox təşkilatdan 406 nümayəndə iştirak etdi. Bu qurultayda ölkəmizin, azərbaycanlıların daha nurlu sabahları üçün çalışanlar ən böyük azərbaycanlının - böyük tarixi şəxsiyyət Heydər Əliyevin Azərbaycan naminə dəyərli tövsiyələrini dinlədilər, bu tövsiyələr də tarixləşdi. Nümayəndələr dünyəvi siyasətdə azərbaycançılığın yerinin möhkəmləndirilməsi üçün nələr etməyin, necə etməyin nəzəri əsaslarını da öyrəndilər”.
"Dünya Azərbaycanlılarının I Qurultayının keçirilməsinin həm Azərbaycan üçün, həm də bütün dünya azərbaycanlıları üçün çox əhəmiyyətli olduğunu qeyd edən Ulu Öndər vurğuladı ki, dünyanın müxtəlif ölkələrində yaşayan azərbaycanlıların bir-biri ilə daha da sıx əlaqə qurması, öz həmrəyliklərini bəyan etməsi və müstəqil Azərbaycan dövləti ilə əlaqələr yaratması tarixin bu mərhələsində çox əhəmiyyətli bir vəzifə kimi meydana çıxır. Ölkəmizin xaricində yaşayan azərbaycanlılar müstəqil Azərbaycan ilə daha da sıx əlaqələr qurmalı, azərbaycanlıların birliyinin, həmrəyliyinin təmin olunması üçün çalışmalıdır. Ulu Öndərin "Xalqları dil qədər, milli-mənəvi ənənələr qədər, dəyərlər qədər birləşdirən başqa bir vasitə yoxdur. Biz bu vasitədən daim istifadə etməliyik” fikri qurultayın leytmotivi kimi dinlənilmişdi”, - deputat əlavə edib.
S.Salmanova söyləyib ki, qurultayda Dünya Azərbaycanlılarının I Qurultayının qətnaməsi ilə, nümayəndələrin bütün dünya azərbaycanlılarına müraciəti ilə bərabər Dağlıq Qarabağ münaqişəsi ilə əlaqədar dünya ictimaiyyətinə, beynəlxalq təşkilatlara, xarici ölkələrin hökumət rəhbərlərinə və parlamentlərinə müraciətlər də qəbul olundu: "BMT Təhlükəsizlik Şurasının qətnamələrini qəbul etməyən Ermənistana ciddi beynəlxalq təzyiq göstərməyən dünya ölkələri bu müraciəti Azərbaycan Ordusunun həll edəcəyini bilməli idi. 19 il sonra dünya dövlətləri gördü ki, Prezident İlham Əliyevin qürurla dediyi "Azərbaycan güclü dövlətdir və onun güclü ordusu vardır” xəbərdarlığı nə qədər real gücə əsaslanırmış. Dünya Azərbaycanlılarının Həmrəyliyi Günü Azərbaycan dövlətçiliyinin daha da möhkəmlənməsində, qüdrətlənməsində böyük rol oynadı və Heydər Əliyev dühasının bəşəriliyinə düşən işıq oldu”.
Parlamentari vurğulayıb ki, "Mən azərbaycanlıyam!” deyən hər bir azərbaycanlı bu günün mahiyyətini yaşam fəlsəfəsi bilir, ömrünü bu fəlsəfənin işığında yaşayır: "Azərbaycan Respublikasının Prezidenti cənab İham Əliyev təməli Ulu Öndər Heydər Əliyev tərəfindən qoyulan milli həmrəylik ideyalarının bu gün də Azərbaycan dövləti üçün öz aktuallığını saxladığını nümayiş etdirir. Bu gün xalqımızın birliyi, həmrəyliyi ölkəmizin inkişafını daha da sürətləndirib. Tariximizə qızıl hərflərlə yazılan Vətən müharibəsində qazandığımız Zəfər həmrəyliyimizin, xal-iqtidar birliyinin bir yumruq ətrafında birləşməyimizin bariz nümunəsidir. 44 günlük müharibədə Ali Baş Komandan İlham Əliyevin rəhbərliyi ilə Müzəffər ordumuz ədaləti bərpa etdi. Bu qələbə Azərbaycanın beynəlxalq mövqelərinin daha da möhkəmlənməsində, nüfuzunun yüksəlməsində mühüm rol oynadı. Bu tarixi qələbəni bizlərə yaşadan Müzəffər Ali Baş Komandan İlham Əliyevin qətiyyəti, siyasi iradəsi həmçinin güclü ordumuzun və xalqımızın həmrəyliyi , birliyi oldu.
Ölkəmizin İkinci Qarabağ müharibəsindəki tarixi ədalətin zəfər çalmasında hər bir soydaşımız əlindən gələni əsirgəmədən yaşadıqları ölkələrdə Azərbaycanın haqq səsinin çatdırılması istiqamətində yorulmadan fəaliyyət göstərdi. Vətən müharibəsində qazandığımız şanlı Zəfərdən sonra dövlətimizin qarşısında dayanan əsas hədəflərdən biri işğaldan azad edilmiş ərazilərimizin bərpasıdır. Ölkə başçısının müvafiq tapşırığı ilə keçmiş məcburi köçkünlərin doğma yurdlarına qayıdışını təmin etmək üçün mühüm işlər görülür. İşğaldan azad edilmiş ərazilərdə müasir infrastruktur formalaşdırılır, dayanıqlı məskunlaşma və iqtisadi reinteqrasiya üçün zəruri şərait yaradılır. Prezident İlham Əliyevin 16 noyabr 2022-ci il tarixli Sərəncamı ilə təsdiq edilmiş "Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı” hazırda uğurla icra edilir. Dövlətimiz Qarabağ və Şərqi Zəngəzur bölgəsinin ölkənin digər əraziləri kimi yüksək inkişaf yoluna qədəm qoyması üçün siyasi iradə sərgiləyir”.
Mən xalqımızı Dünya Azərbaycanlılarının Həmrəyliyi Günü münasibəti ilə təbrik edir. Bugün hər bir azərbaycanlı cənab Prezident İlham Əliyevin rəhbərliyi ilə yeni zirvələrə doğru inamla addımlayacağına tam əmindir.
Bu həmrəylik bizi yeni-yeni qələbələrə aparacaq”, - deputat deyib.
Xəbərdən istifadə edərkən istinad etmək vacibdir.
