"Əli və Nino" mağazalar şəbəkəsinin rəhbəri Nigar Köçərli və Qanun Nəşriyyatının sahibi Şahbaz Xuduoğu yeni layihəsi olan "Təkərli kitab dükanı" Sumqayıta gəlib.
Xeberle.com-un məlumatına görə, "Təkərli kitab dükanı" şəhərin simvolu olan "Göyərçin" parkından başlayaraq digər ünvanlara hərəkət edib. Təkərli kitab evi şəhər sakinlərinin diqqətini çəkib.
Layihə müəlliflərindən biri olan Şahbaz Xuduoğlu qeyd edib ki, "Təkərli kitab" tədricən öz auditoriyasını qazanır: "Bu gün təkərli kitab Sumqayıtda olub. Dünən Aşağı Güzdək, yəni köhnə Güzdəkdə və Müşfiq qəsəbəsində olduq.
"Təkərli kitab" tədricən öz auditoriyasını qazanır. Bizi sosial şəbəkələrdə izləyirlər, yanımıza gəlirlər. Bundan böyük mənəvi dəstək ola bilməz.
"Təkərli kitabı" çox yerlər dəvət edir. Əmin olun, dəvət aldığımız hər yerdə olacayıq. Sumqayıtda oranın simvolu olan "Göyərçin parkı"ndan başlayıb vəziyyətə uyğun hərəkət etdik".
Qeyd edək ki, bu layihə "Təkərli kitab dükanı" adlanır və layihənin yaradılmasında məqsəd kitabı daha da əlçatan etməkdir. Bu səyyar dükan bir maşından ibarət olacaq və Azərbaycanı qarış-qarış gəzərək ən ucqar kəndlərdə yaşayanlara həm sərfəli qiymətlə kitablar təqdim edəcək, həm də məşhur yazıçıları, tanınmış mədəniyyət nümayəndələrini onların görüşünə aparacaq.
Elşən Yəhyayev
Xəbərdən istifadə edərkən istinad etmək vacibdir.
