Ağla, Qara dəniz, ağla!!!

Qara  dəniz... ağı söylə, bayatı de...

De ki..,

Dağlar necə dağlarsan,

Dağlar qara bağlarsan,

Olub keçən ömrünü “Krım” - deyib ağlarsan.

Qara dəniz için-için ağlayırsan,

Mavi-mavi göz yaşını öz içinə ağlayırsan?!

Qara dəniz, heç coşmadın, qabarmadın,

Sərt üzünü göstərmədin?

Hanı sənin tufanların?!

Niyə belə susub durdun?!

Qabarmadı dalğaların...?!

Qara dəniz... Ağməsçidin əkiz tayı

İstanbuldan səs gəlmədi...

Bağlıydı bərələr, yollar?!

Qara-qara göz yaşından,

Dönüb qara olan dəniz,

Ay talesiz, ay sahibsiz, Qara dəniz...

Ağməsçidə, Alupkaya, Aluştaya

Durub sahib olammadın,

Ay vəfasız anam dəniz...

Mavi gözlüm, yaşıl saçlım,

Qara dəniz!!!

Gör nələrə şahid oldun...

Yenə düşmən güclü çıxdı,

Urus gəlib səni yıxdı...

Ağlar qalan anam dəniz,

Barı xəbər göndərəydin

Şərqi Qərbi diz çökdürən Gəray xana...

Bahaduru çağıraydın,

Dövlət Gəray, Sadat Gəray yetişərdi harayına.

Gözündən ov yayınmayan

Qaplan Gəray eşidərdi harayını.

Heç elə bil o türkləri, o bəyləri, sultanları

Krım ana doğmayıbdır...

Çeşmə-çeşmə bulaqlardan,

Yaşıl-yaşıl yaylaqlardan,

Başında qartallar uçan

Şahinlərə məskən olan

Aybədri, Baba dağından

Güc almışdı o igidlər, o sultanlar...

Rum elinin elçilərin...

Qarşılayan Sultan Gəray!!!

Dur Ordunla meydana çıx!

Yağı düşmən zəbt elədi səndən qalan oylaqları.

Güvənc yerim, qibləgahim Atatürküm

Demişdi ki: “Türkdü ancaq türkə qardaş...”

Ay azəri, türk qardaşlar hardaydınız?

Niyə bu gün o meydanda Tatarları tək qoydunuz?!

E...heeyyy...

Ey səsimə hay verməyən, Türk dünyası,

Təklənmişəm, Məni əsir götürüblər!!!

Krımda qırğındı bu gün,

Krımda qırımdı bu gün...

Xan şəhərim Ağməsçiddən Osmanlının sultanları üz döndərdi.

Tanrı Krımı təklədi...

Eşitmədi nə Zeranın, nə Arzunun harayını,

Parçaladı Bekiroğlunun bağrını,

Məzarı da çat-çat oldu...

Tanrı başqa yerdə idi..

Eşitmirdi,

Uruslara kef edirdi...

Baxçasaray, bizdən sənə yar olmadı,

Viran qalsın  bundan sonra xaçpərəstə

Qismət olan ocaqların.

Ay görəndə bədirlənən,

Vüqarlı Aybədri dağım,

Bədirlənmə,

İsmətini verdik əldən...

Yenə də bir qeyrət yeri getdi eldən..

Türklər haraya gəlmədi,

Bakı dərdini bilmədi..

Ağla, Qara dəniz, ağla,

İsmətli Ay bədri dağı,

Dumanlardan örpək olmaz,

Daha başa qara bağla!!!

Ağla Qara dəniz, ağla!!!

Aidə Eyvazlı