Sumqayıt öz tarixi keçmişi, adət-ənənəsi olan şəhərdir. Sumqayıt təkcə iri zavodları, fabrikləri ilə deyil, təhsil, elm, mədəniyyət, ədəbiyyat sahəsində qazandığı uğurları ilə də göz önündədir. Şəhər statusu almasından 70 il keçməsinə baxmayaraq, tarixi mənbələr onun kökünün çox qədim dövrlərə gedib çıxdığını sübuta yetirir.
Xeberle.com xəbər verir ki, bu sözləri AZƏRTAC-ın müxbirinə müsahibəsində Sumqayıtın 70 illiyi ərəfəsində Prezident İlham Əliyevin Sərəncamı ilə "Tərəqqi” medalına layiq görülmüş Azərbaycan Yazıçılar Birliyinin Sumqayıt bölməsinin sədri Gülnarə Cəmaləddin bildirib.
Sumqayıtın ümummilli lider Heydər Əliyevin ölkəmizə rəhbərlik etdiyi dövrdə qabaqcıl sənaye şəhəri kimi inkişaf etdiyini, yeni yaşayış binalarının tikilib istifadəyə verildiyini, xiyabanlar, parklar salındığını, sosial, mədəni-məişət obyektlərinin tikildiyini xatırladan G.Cəmaləddin deyib: "1982-ci ildə Heydər Əliyev Moskvaya getdikdən sonra Azərbaycanın hər yerində olduğu kimi, Sumqayıt da öz tənəzzül dövrünə qədəm qoydu. Ulu Öndər yenidən Azərbaycana rəhbərliyə gəldikdən sonra isə respublikada, o cümlədən Sumqayıtda yeni inkişaf dövrü başladı. Bu siyasət hazırda Ulu Öndərin layiqli davamçıları Azərbaycan Respublikasının Prezidenti İlham Əliyev və Birinci vitse-prezident Mehriban xanım Əliyeva tərəfindən uğurla davam etdirilir”.
Sumqayıtda gedən abadlıq–quruculuq işlərindən, infrastruktur dəyişikliklərindən, sosial-mədəni sahədə aparılan islahatlardan danışan G.Cəmaləddin Şahmat klubunun, Musiqi məktəbinin, Heydər Əliyev Mərkəzinin, Muğam Mərkəzinin, Nizami kinoteatrının tikilib istifadəyə verilməsini, Sumqayıt Dövlət Dram Teatrının, Kimyaçılar Mədəniyyət Sarayının əsaslı təmirini Sumqayıtda gerçəkləşən titanik layihələrin yalnız bir hissəsi olduğunu bildirib.
Gülnarə Cəmaləddin deyib: "Sumqayıt güclü ədəbi ictimaiyyəti ilə də tanınır. Görkəmli şair Əli Kərimin bu şəhərlə sıx əlaqələri, uzun müddət respublika ədəbi gəncliyinə rəhbərlik etmiş Vaqif İbrahimin sumqayıtlı olması, dövrünün ədəbi gəncliyinin öncüllərindən olan şair Əşrəf Veysəllinin, Əvəz Mahmud Lələdağın, Məmməd Aslanın, Xasay Cahangirovun, publisist Feyzi Mustafayevin, uşaqlar üçün yazılmış şeirləri dərsliklərə salınmış Mir Sabirin, professor Rafiq Yusifoğlunun, Tofiq Məmmədin, Məmməd Namazın 70–80–ci illər ədəbi gəncliyinin ən istedadlı nümayəndələrindən Məmməd İlqarın, Sabir Sarvanın, Zirəddin Qafarlının, Şaiq Vəlinin, Akif Səmədin, Gülbala Mehdinin və başqalarının burada yaşayıb–yaratması dediklərimizə sübutdur. Şəhərin 70 illiyi ilə əlaqədar Prezident İlham Əliyevin Sumqayıta səfəri bizi bir daha qürurlandırdı. Ölkə rəhbəri tərəfindən bir qrup Sumqayıt sakininin müxtəlif fəxri adlara layiq görülməsi ədəbiyyatımıza, milli-mənəvi dəyərlərimizə, şair və yazıçılarımıza dövlət tərəfindən göstərilən diqqət və qayğının bariz nümunəsidir. Bu etimada görə mən öz adımdan, Sumqayıtda yaşayıb–yaradan Yazıçılar Birliyinin üzvləri adından dövlətimizin başçısına dərin təşəkkürümü bildirirəm”.
Xəbərdən istifadə edərkən istinad etmək vacibdir.
