Sumqayıt şəhərində ötən illərə nisbətdə tikinti işləri artıb, abadlaşma işləri öz axarında davam etməkdədir.
Bir sıra infrastruktur layihələri həyata keçirilən "Gənclər şəhəri"ndə bəs nələr çatışmır? Sakinlər şəhərimizdə hansı yenilikləri görmək istəyirlər?
Xeberle.com olaraq sumqayıtlılar arasında sorğu keçirdik. Məlum oldu ki, sakinlərin böyük bir qismi şəhərimizdə çoxprofilli alış-veriş mərkəzinin (AVM) fəaliyyətə başlamasını istəyirlər.
Bəziləri isə məktəblərdə olan şagird sıxlığından öz narazılığını dilə gətirərək, yeni məktəblərin tikilməsini, bir sinifdə şagird sayının minimuma endirilməsini təklif edib.
Bununla yanaşı, işsizlikdən əziyyət çəkən, iş tapmaqdan ötrü Bakıya üz tutanlar da az deyil.
Bir neçə nəfər qurumların Sumqayıtda artan insan sayını nəzərə almasını və buna əsasən də yeni iş yerlərinin fəaliyyət göstərməsini istəyirlər.
Övladı olan valideyinlər isə uşaqlar üçün əyləncə mərkəzləri və uşaq parklarının sayının artırılmasının uşaqların vaxtını səmərəli keçirməsi üçün çox yaxşı təşəbbüs olacağını düşünür.
Şəhəri zibilləyən insanlardan cana gələn bir qrup insan hər yerdə - addımbaşı zibil qutularının yerləşdirilməsi və zibillərin, siqaret kötüklərinin həmin qutulara atılmasını tələb edən nişanların qoyulmasını istəyir.
Aygün İsmayılova
Xəbərdən istifadə edərkən istinad etmək vacibdir.
