Maraqlıdır, sakinlər son dəyişikliklərdən sonra ictimai nəqliyyatın fəaliyyətindən razıdırlarmı?

Xeberle.com olaraq davamlı şəkildə sosial şəbəkələrdə sorğular keçiririk. Bu dəfə isə istifadəçilərimizə "Şəhərdə hansı marşutların fəaliyyətdən razı, hansılardan narazısınız?" sualını ünvanladıq.

Sorğumuzda 100-ə yaxın sumqayıtlı istifadəçi iştirak edib. Nəticəyə əsasən şəhər sakinləri 5, 6, 7, 8, 9, 10A, 33 nömrəli avtobusların fəaliyyətlərindən razılıq ediblər.

Bəzi istifadəçilər isə 10A nömrəli avtobusun əksər vaxtlarda sıxlıq olmasından və sürücülərin dayanacaqlarda saxlamamasını qeyd ediblər. Onlar bildiriblər ki, bunun əsas səbəbi Sumqayıt şəhər Dəmiryol Vağzalına gedən 25 nömrəli avtobusun bağlanmasıdır. Həmçinin istifadəçilər 25 nömrəli avtobusun bağlanmasından narazı olduqlarını və yenidən fəaliyyətə başlamasını gözlədiklərini bildiriblər.

Daha sonra onlar 2, 3, 4, 15, 30, 39 nömrəli avtobusların intervallarından narazı olduqlarını bildiriblər.Onlar qeyd ediblər ki, sözügedən avtobuslar 20-40 dəqiqə intervalı ilə işləyirlər və bu səbəbdən də işə, evlərinə vaxtında çata bilmirlər.

Bunlardan başqa 16, 17, 17A, 18, 19, 27, 501, 522B, 523 nömrəli avtobusların köhnə və istifadəyə yararsız olduqları da səslənən fikirlər arasında olub.

Aparılan virtual sorğudan o da bəlli olur ki, şəhərdə fəaliyyət göstərən bəzi avtobuslarda təmizliyə riayət olunmur.

Ümid edirik ki, bu problemlər qısa zaman ərzində öz həllini tapacaq.

Hicranə İsmayılova

Xeberle.com