Uşaqların
inkişafında, formalaşmasında televiziya proqramlarının, xüsusilə də uşaq
verilişlərinin, cizgi və animasiya filmlərinin rolu danılmazdır. Lakin günümüzdə
bu sahədə çoxsaylı problem yaşanmaqdadır. Belə ki, efirdə yayımlanan cizgi
filmlərinin demək olar ki, hamısı xarici ölkələrin istehsalı olan ekran əsərləridir.
Hazırda ölkəmizdə sözügedən proqramların istehsalı yox dərəcəsindədir.
Bəs Azərbaycanda
cizgi filmlərin istehsal edilməməsinin səbəbi nədir?
Bu barədə Xeberle.com-a açıqlama verən media eksperti, professor
Qulu Məhərrəmli problemin səbəblərindən danışdı:
"Birincisi, ona görə ki, bu məsələyə lazımi
diqqət yetirilmir. İkincisi, bu, dövlətin himayəsində və onun köməkliyi ilə
olmalıdır. Üçüncüsü, kinostudiya və ya Azərbaycan Dövlət Televiziyası bu məsələ ilə məşğul
olmalıdır. Çünki digər televiziyaların cizgi filmi çəkmək imkanları məhduddur.
Dördüncüsü, bu sahədə ixtisaslı kadrlar azdır. Olanlar da yavaş-yavaş sıradan
çıxır və nəticədə mütəxəssislərimizin sayı azalır. Amma uşaq təşkilatları,
fondları, dövlət qurumları sözügedən məsələni qaldırsalar, dövlət məmnuniyyətlə
bu işə maliyyə ayıra bilər. Bu, sistemli və layihə şəklində reallaşdırılmalıdır
ki, uşaqlar üçün cizgi filmləri və animasiyalar çəkilsin. Çünki bizim uşaqlar
yalnız "Nicoledeon” və türk kanallarında yayımlanan cizgi filmlərini izləyirlər.
Bu millətin gələcəyi haqqında düşünmək, uşaqların sabahını, dünyagörüşünü,
onların dəyərlərə bağlılığını təmin etmək lazımdır. Ona görə də bu iş dövlət əhəmiyyətli,
fövqəladə dərəcədə vacib bir işdir. Çox təəssüf ki, nə aidiyyəti orqanlar, nə də
kino, televiziya qurumları bu məsələyə lazımi diqqət yetirmir”.
Animasiya
rejissoru Elçin Axundov isə bu probelmin Azərbaycan Respublikasının Mədəniyyət
Nazirliyindən qaynaqlandığını bildirdi:
"2005-ci
ildə Mədəniyyət Nazirliyinə layihə vermişdim. "Azərbaycan animasiyasının
inkişafına dair” adlı layihə idi. Layihəyə əsasən 20 nəfər rəssam və
aktyorların içərisindən seçim edərək onlarla bir il məşğul olmalı və onlara
animasiya, hərəkət qanunlarını öyrətməli idim. Bir ildən sonra isə tammetrajlı
( 1 saat yarım) filmin ssenarisi, rejissor ssenarisi və hazırlıq dövrü müəyyənləşdirilməliydi.
Daha sonra isə istehsalat dövrü başlayacaq və rəssamlar, aktyorlar iş ilə təmin
olunacaqdılar. Layihəni Mədəniyyət nazirinə, kino işləri şöbəsinə təqdim edəndə
çox sevindilər. Amma dedilər ki, hazırda maliyyə yoxdur. 13 ildir ki, onlar pul
axtarırlar. Əgər həmin layihə o vaxtı həyata keçsəydi, indi bizim animasiya
filmlərimiz çox inkişaf edəcək, bir yox, beş-altı müstəqil studiyamız
olacaqdı”.
ARB
TV-nin strateji inkişaf marketinq və media direktoru İsmayıl Həsənov bildirdi
ki, gələcəkdə "ARB Günəş”in maddi
imkanları genişlənərsə, telekanal yeni cizgi filmləri istehsal edəcək:
"Nəzərə alaq ki, "ARB Günəş” Azərbaycanın ilk
uşaq kanalıdır və sırf uşaqlara ünvanlanan proqramlar və verilişlər yayımlayır.
Yerli cizgi filmlərinin istehsalı məsələsinə gəldikdə isə, bilirsiniz ki, cizgi
filminin istehsalı bədii filmdən də baha başa gəlir və çox məsrəf tələb edən
bir sahədir. Hələ ki, kanal öz imkanları sayəsində faktiki olaraq efirdə
yayımlanan kontentləri hazırlayır. Gələcəkdə telekanalın maddi imkanları genişlənərsə,
hər halda biz yeni cizgi filmləri istehsal edərik. Yəni hər şey maliyyə məsələlərindən
asıldır”.
Elnarə
Salamova
Xeberle.com
Xəbərdən istifadə edərkən istinad etmək vacibdir.
