Məhz bu səbəbdən Xeberle.com olaraq budəfəki sorğumuzu mundiala həsr etmək qərarına gəldik. Maraqlıdır, Sumqayıtın tanınmış şəxsləri, məmurları hansı ölkəyə azarkeşlik edirlər?

Teymur Səmədov, Sumqayıt şəhər İcra hakimiyyəti başçısının birinci müavini: "Əvvəllər Türkiyə iştirak edəndə, ona azarkeşlik edirdim. İndi Misirə azarkeşlik etsəm də, yaxşı oynaya və nailiyyət əldə edə bilmədi. Ona görə də hal-hazırda azarkeşlik etdiyim ölkə Argentinadır. Özüm ixtisasca ingilis dili müəllimi olsam da, ingilislərin psixologiyasına yaxşı bələd olduğum üçün onlara azarkeşlik etmirəm”.

Akif Quliyev, Sumqayıt şəhər İcra hakimiyyəti başçısının müavini:"Futbola azarkeşlik etmirəm. Voleybol, basketbol, snuker kimi oyunlar üzrə çempionatlara baxmağı xoşlayıram”.

Vaqif Ömərov, "Sumqayıt” klubunun vitse prezidenti: "Rusiya, Braziliya və İspaniyaya azarkeşlik edirəm”.

Mübariz Bəşirov, Sumqayıt Gənclər və İdman Baş İdarəsinin rəis əvəzi: "Futbol üzrə Dünya Çempionatını izləyirəm. Azarkeşlik etdiyim ölkə Almaniyadır”.

Məhəmməd Məmmədov, Sumqayıt şəhər Təmizlik Departamentinin direktoru: "Həqiqəti bilmək istəyirsinizsə, mənim işim o qədər çoxdur ki, inanın səmimiyyətimə futbola baxa bilmirəm. Hər səhər 6-nın yarısı oyanır və işə gedirəm, axşam evə nə vaxt gəldiyim də bəlli deyil. O qədər yoruluram ki, dincəlməyi özümə qənimət hesab edirəm. Futbola baxmağı xoşlayıram, amma ərazi böyükdür və yay mövsümü olduğu üçün işimiz də artıb. Çatdıra bilmirəm”.

Samir Şəfiyev, Sumqayıt şəhər Nəriman Nərimanov adına Mədəniyyət Mərkəzinin direktoru: "Mən Xorvatiya və Portuqaliyanın çempion olacağına inanıram. Onların hər ikisini finalda görürəm. Amma Xorvatiya çempion olsa, daha çox sevinərəm”.

Rafiq Oday, «Azərikimya» İstehsalat Birliyinin mətbuat xidmətinin rəhbəri: "Mən bu dünya çempionatını vaxt məhdudluğundan izləyə bilmədim. Ona görə də heç bir ölkəyə azarkeşlik etmirəm”.

Müşfiq Məmmədli, Sumqayıt şəhər Uşaq Xəstəxanasının baş həkimi:"Mən Xorvatiyaya azərkeşlik edirəm. Rusiyanın da oyunlarını bəyənirəm. Məncə, Xorvatiya bu çempionatda önəmli yerlərdən birini tutacaq. Hətta yarımfinalda Rusiya ilə Xorvatiyanın qarşı-qarşıya gələcəyini düşünürəm”.

Elnarə Salamova

Xeberle.com