Xeberle.com olaraq bu mövzunu şəhərimiz üçün işləyib, o cümlədən də ictimaiyyəti maraqlandıran digər əsas mövzuları işıqlandırıb aydınlıq gətirmək bizim vəzifə borcumuzdur. Şəhərdə şəkərli diabet xəstələrinin statistikası ilə bağlı məlumat əldə etmək istəsək də, digər məsələlər kimi bu mövzuyla bağlı da suallarımıza cavab tapa bilmədik. Ona görə ki, Sumqayıt Səhiyyəsindən hər hansı bir məlumatı alıb mövzu araşdırmaq bizim üçün artıq həllolunmaz məsələyə çevrilib. Sivil, demokratik ölkədə yaşasaq da, səhiyyə şöbəsi nədənsə bunu unudur və hər dəfədə eyni formada bizə məlumat verməkdən boyun qaçırır.

"Siz kimsiniz ki, mənə zəng vurursunuz?! Mən sizin heç bir sualınıza cavab verməyəcəm! Səhiyyənin sizə nə aidiyyəti var, gedin gündəlik xəbərlərinizi hazırlayın. deyən Sumqayıt şəhər Səhiyyə Şöbəsinin müdiri Nəriman Baxşəliyevə bildirmək istəyirik ki, biz öz maraqlarımız əsasında xəbər hazırlamırıq. Aidiyyəti qurumlara sakinlərin marağı, onların problemləri ilə bağlı müraciət edirik, amma nədənsəson vaxtlar Sumqayıt Səhiyyəsi ilə əlaqəli çox material hazırlamalı oluruq, bunun da tək səbəbi olunan müraciətlər və şikayətlərdir.

"Səhiyyə şöbəsinin rəhbəri olan şəxsin bu tərzdə davranışı mediaya deyil, ictimaiyyətə qarşı açıq hörmətsizlikdir. Ümumiyyətlə bu tip davranışlara Səhiyyə Nazirliyi, müvafiq qurumlar susqunluq nümayiş etdirməməli, ən azından həmin şəxsi çağırıb profilaktik söhbətlər edib, onlara ölkənin vətəndaşlarının ödədiyi vergi sayəsində maaş aldığını xatırlatmaq, cavabdeh olduğu qurumun hesabatını mediaya lazımı qaydada təqdim etmək vəzifəsini xatırlatmalıdır”.

Bu sözləri Xeberle.com-a mövzu ilə əlaqəli fikirlərini bildirərkən hüquqşünas Ramil Süleymanov söyləyib. O, həmçinin bildirib ki, Həsən bəy Zərdabinin bir deyimi var: "Qəzet camaat üçündür, camaat qəzet üçün deyildir”. Başqa sözlə desək, insanlara doğru xəbər çatdırmaq hər zaman önəmli olub, ümumiyyətlə cəmiyyətin bəzi sahələri insanlar üçün xeyli vacib olduğu üçün xalq bununla bağlı mütləq məlumatlandırılmalıdır! O cümlədən də səhiyyə sahəsi ictimaiyyətin həmişə marağında olur ki, məsələn, hansı xəstəliklərin artım səviyyəsi qalxıb, profilaktik müayinələr aparılması ilə əlaqəli dövlət hansı proqramları həyata keçirib və yaxud da bu sahədə ambulator müalicələr alan şəxsləri dövlət hansı dərmanlarla təchiz edir, hansı dərmanların təminatında problemlər var. Bütün bunların hamısı ilə əlaqəli ictimaiyyətin məlumat almaq kimi bir haqqı var. İctimaiyyətin bu məlumatları almağa ona görə haqqı var ki, dövlət qurumları və dövlət orqanları dövlət büdcəsindən mailiyyələşirlər. Həmin dövlət büdcəsi isə insanların ödədiyi vergilərdən və digər ödənişlərdən formalaşır. Əgər məmurlar maaş alırlarsa və onların maddi təminatı xalqın cibindən çıxırsa həmin məmur dərk etməlidir ki, eyni zamanda həmin cəmiyyətə hesabatını da verməlidir. Vətəndaş həmin hesabatı ya qurumların rəsmi internet səhifələrindən, ya da ki, həmin məsələlərlə bağlı cəmiyyəti məlumatlandırma kimi vəzifə öhdəliyi olan media qurumları vasitəsiylə almalıdır".

Ramil Süleymanov həmçinin bildirib ki, Azərbaycan Respublikasında insanlarmediaya güvənir, çünki tərəfsizliyi və qərəzsizliyi ilə seçilən mətbuat qurumları çoxluq təşkil edir. Xüsusi ilə də Sumqayıt şəhərində hər bir problemə həssaslıqla yanaşan Xeberle.com mətbu qurumuna. Ən azından sakinlər bu saytın tərəfsiz, qərəzsiz araşdırmalar apardığını bilirlər. Bu saytın əməkdaşına Sumqayıt şəhər Səhiyyə şöbəsinin rəhbərliyi tərəfindən məlumat verilmədən kobudcasına geriyə çevirməsi etik normalara da uyğun deyil, çünki dövlət məmuru vətəndaşlarla, o cümlədən də media nümayəndələri ilə həmin dövlətin bir üz qabığı olaraq çıxış etmək və açıqlama vermək kimi öhdəliyi var. Həm də jurnalist şəxsi maraqları üçün məlumat istəmir məmurdan, vətəndaşların yazılı yaxud da şifahi edilən müraciətləri əsasında bu mövzulara toxunulur və dövlət məmurundan da açıqlama alınması lazım gəlir. Məmurların da ona ünvanlanmış sorğunu cavablandırmaq birbaşa borcudur”.

Xeberle.com