Xəbər verdiyimiz kimi, Azərbaycan Prezidenti İlham Əliyev İnzibati Xətalar Məcəlləsində dəyişiklik edilməsi haqqında qanunu imzalayıb. Tütünlə bağlı cərimələrin tətbiq olunması ilə məcəllənin 322-ci (Avtomobil nəqliyyatı ilə sərnişin və baqaj daşınması qaydalarının pozulması) maddəsinin 0.4-cü bəndinə əsasən, müntəzəm şəhərdaxili (rayondaxili), şəhərlərarası (rayonlararası) və beynəlxalq marşrutlar üzrə hərəkət edən avtobusda siqaret çəkilməsinə 40 manatdan 50 manatadək məbləğdə cərimə edilir. Bu cərimə sərnişin daşımaları üzrə ümumi istifadədə olan avtomobil nəqliyyatı vasitəsində və taksi minik avtomobilində tütün çəkənlərə də tətbiq olunacaq.

Qanun artıq qüvvəyə minib və qanunun icrası, tətbiq olunan cərimələrlə bağlıdaha ətraflı məlumat almaq üçün hüquqşünas Ramil Süleymanov ilə əlaqə saxladıq. Hüquqşünas bildirdi ki, taksilər də ictimai nəqliyyatın bir növü olduğu üçün, bu qanunun qüvvəyə minməsinə zərurət var idi: "Taksilər hər kəsin istifadə edə biləcəyi nəqliyyat növü olduğundan, bu qərar "taksisevərlər” üçün də əhəmiyyətlidir. Ümumilikdə sərnişin taksidən istifadə edərkən avtomobilə əyləşdiyi andan sürücü qanun barədə sərnişini məlumatlandırmalıdır. Sərnişin əgər sürücünün xəbərdarlığına əhəmiyyət vermədən siqaretdən istifadə edərsə, sürücü müştərini istədiyi zaman avtomobildən düşürə bilər. Məsələnin digər tərəfi isə ondan ibarətdir ki, qanunda bu cərimələri kimin tətbiq edəcəyi, yaxud da protokolların hansı formada yazaılacağı barədə heç bir məlumat qeyd olunmayıb. Fərqlənmə nişanı vasitəsilə taksi xidməti ilə məşğul olan fiziki və hüquqi şəxslərə şamil olunan bu qərarla bütün sürücülərin qanun pozuntusuna yol verən sərnişinlərdən imtina etmək hüququ var. Qanun hamıya şamil olunur, lakin qaçaq şəkildə, qanundan kənar taksi fəaliyyəti ilə məşğul olan şəxsləri aşkar etmək mümkün olmayacaq. Digər tərəfdən isə, qanunun işləkliyini təmin etmək üçün məsuliyyət və öhdəlik daha çox sahə müvəkkillərinin üzərinə düşür. Əgər bu gün bəzi sahə müvəkilləri nəyinsə müqabilində obyekt sahiblərinin özbaşnalıqlarına göz yumursa, bu, birbaşa olaraq qüvvəyə minən qanunun ölü qanun olmasına gətirib çıxarır. Ona görə də qanundan cavabdeh orqanlar, dövlət məmurları məsələyə ciddi yanaşmalı, nəzarət güclü olmalıdır. Yeri gəlmişkən, iqtisadçıların proqnozlarına görə gələn ildən aksiz vergilər də artırılacaq və bu da siqaret məhsullarının qiymət artımına səbəb olacaq amillərdəndir. Bununla da siqaretdən istifadə azalacaq. Ümumilikdə isə bir hüquqşünas kimi deyil, vətəndaş olaraq siqaretdən istifadə edənlərə öz sağlamlıqlarını təhlükə altında qoymamalarını tövsiyə edərdim”, - deyə R.Süleymanov söyləyib.

Xədicə Səxavətqızı

Xeberle.com