Son dövrlər ölkə ərazisində internetin keyfiyyəti ilə bağlı
ciddi problemlər yaşanır. Hətta bəzi provayderlərin internet təminatında qısa
fasilələr də müşahidə olunur. Bir sıra özəl provayderlər isə bu problemin
onlardan qaynaqlanmadığını bildirirlər.
Sumqayıt şəhərində də bəzi internet provayderlərin fəaliyyəti heç də şəhər sakinlərini qane etmir. Xeberle.com-a məxsus sosial şəbəkələrdə keçirilən sorğu da bunu deməyə əsas verir.
Belə ki, respondentlərə "Sumqayıtda hansı ərazilərdə internet problemi
yaşanır və hansı provayderlərdir?"
sualı ünvanladıq. Sorğuda iştirak edənlərin 46 faizi, yəni 165 nəfəri "Aztelekom”- un fəaliyyətindən narazı
olduğunu bildirib. Respondentlərdən 24 faizi, rəqəmlə ifadə etsək 52 nəfəri isə
SN Telekomdan narazı olduğunu qeyd edib.
Şikayətlərin çoxluğunu nəzərə alaraq Sumqayıt
Telekommunikasiya Qovşağının rəhbəri Nəriman Salmanovla əlaqə saxladıq.
N.Salmanov öncə mövcud problemlə bağlı yaranan sualları Nazirliyə ünvanlamağımızı bildirsə də, daha sonra verilən sualları belə
cavablandırdı: "Aztelekom” – un fəaliyyətinin zəif olması ilə bağlı bildirilən
fikirlər yalnışdır. Yaxın günlərdə yaranan problem bütün provayderlərin işinə
öz təsirini göstərib. Magistral internet kabellərinin üzərində yaranan qəza ilə
əlaqəli bütün provayderlərdə bu problem yaşandı və qısa müddətdə aradan
qaldırıldı. Bu gün "Aztelekom” – da digər
provayderlərdən fərqli, yeganə olaraq yaratdığımız bir sistem var ki, onun vasitəsi ilə internet istifadəçisi bizim "Çağrı
mərkəzi" ilə əlaqə saxladıqda 10 dəqiqə
müddətində vətəndaşa geri zəng olunur və onun problemi maksimum 1 saat ərzində
aradan qaldırılır. Günün istənilən saatında bunu siz özünüz də yoxlaya bilərsiniz".
Telekommunikasiya Qovşağının rəhbəri həmçinin onu da qeyd
etdi ki, normal günlərdə istifadəçi 1MgBit sürətli internet götürürdü və bundan da normal
qaydada yararlana bilirdi. Lakin bu gün karantin müddətində ailə üzvlərinin hamısının evdə olması, 1MgBit internetə qoşulması, əlbəttə ki,
onların təlabatını ödəməyəcək. Bu gün araşdırılan əksəriyyət problemlərin də
kökündə bu durur və istifadəçinin müraciəti əsasında internetin sürəti
qaldırıldıqdan sonra sözügedən problem
bir daha yaşanmır. Hazırda Sumqayıt şəhəri üzrə "Aztelekom”-un 26 - 27 min
abonenti var və bu bütün şəhər ərazisini əhatə edir.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
