İkinci Qarabağ müharibəsi
yekunlaşsa da, məğlub Ermənistanda hələ də günahkarlar axtarılır,
hərbçilərə qarşı cinayət işləri açılır.
Erməni KİV-ləri növbəti dəfə bu mövzuya toxunaraq diqqətçəkən yazı dərc ediblər.
İddia olunur ki, bəzi yüksək rütbəli hərbçilərə qarşı müəmmalı şəkildə cinayət işləri açılıb.
Məlumata görə, oktyabrın 9-da Qubadlının Xanlıq kəndində Azərbaycan
Ordusuna məxsus dronun səsini eşidəndə hərbi hissə komandirinin müavini
hərbçilərə dərhal avtomobillərə minməyi əmr edib. Lakin onlar PUA-nın
zərbəsindən yayına bilməyiblər. Nəticədə xeyli sayda erməni hərbçisi
ölüb.
8 dekabrda vətəndaş X. (ad şərtidir-red) baş prokuror Artur Davtyana
müraciət edərək deyib ki, Ermənistanda hərbi vəziyyət elan edildikdən
sonra oğlu A.O.-nun hərbi hissənin tərkibində Qarabağa aparıldığını
öyrənib. O, hərbçiləri müşayiət edərək şəxsi avtomobili ilə oğlunun
yanına gedirmiş.
Erməni şikayətçinin sözlərinə görə, məlum insidentin - Azərbaycan
PUA-sının səsi eşidilən kimi komandirin verdiyi əmrin və sonrakı
faciənin şahidi olub. Onun oğlu və digər hərbçilər havadan endirilən
zərbədən hadisə yerində ölüblər.
Baş prokurorun təlimatı ilə məsələ dərhal nəzarətə götürülüb, Hərbi
Prokurorluq vasitəsilə istintaq işi araşdırılmağa başlanıb və hadisə ilə
əlaqədar 21 dekabrda cinayət işi açılıb.
İlkin istintaq zamanı hadisənin baş verməsinə dair dəlillər əldə edilib.
Belə ki, oktyabrın 9-da mühəndis tağımı daxil olmaqla hərbi hissənin
bütün heyətinin Qarabağın Horadiz bölgəsindəki Tili kəndinə köçürülməsi
üçün yuxarı komandanlıqdan əmr gəlib. Qubadlının Xanlıq kəndində
Ermənistan müdafiə nazirliyinin N saylı hərbi hissə komandirinin
müavini, (döyüş hazırlığı üzrə müavin) polkovnik-leytenant A. V. S.
şəxsi heyəti daşıyan "Ural” hərbi maşınında olan hərbçilərin ətrafa
səpələndiyini görüb.
Polkovnik-leytenant komandanlığa zəng edərək hadisəni məruzə edib və
hərbi kolonun dayandığını şəxsi heyətin Azərbaycan PUA-larına görə
avtomobillərdən düşərək səpələndiyini deyib. O, havadan gələn səsi
dinləyib və şəxsi heyətə avtomobilə minib yola davam etməyi əmr edib.
Qeyd edib ki, dronlarla mübarizə onların deyil, hava hücumundan müdafiə
qüvvələrinin problemidir.
Tağım komandiri əmrə tabe olub, hərbi hissənin 19 hərbçisi maşına
minərək yola davam edib. Təxminən 5 dəqiqə sonra PUA avtomobili məhv
edib. Nəticədə güclü yanğın və partlayış baş verib. Bir nəfər sağ qalıb,
18 hərbçi isə yerindəcə ölüb. Eyni zamanda "Ural” hərbi maşının
qarşısında gedən mülki avtomobildə hərbi hissənin mühəndis xidmətinin
rəisi və sürücü müxtəlif dərəcəli bədən xəsarətləri alıblar.
Əldə edilən dəlillər əsasında 29 dekabr 2020-ci il tarixdə müdafiə
nazirliyinin N saylı hərbi hissə komandirinin döyüş hazırlığı üzrə
müavini, polkovnik-leytenant A.-ya cinayət məcəlləsinin 375-ci
maddəsinin dördüncü bəndi üzrə iş açılıb. O, cinayət əməli törətməkdə
günahlandırılır. (azvision.az)
Xəbərdən istifadə edərkən istinad etmək vacibdir.
