"Bu tip bildirişlərin gəlməsi çox normaldır. Vətəndaşlar həmin torpaqların icarəyə götürülməsi ilə əlaqəli bələdiyyə ilə müqavilə bağlamayıblarsa və rəsmi torpaq kadastrında həmin torpaqların mülkiyyətçisi kimi Sumqayıt şəhər bələdiyyəsi çıxış edərsə, bələdiyyə tam hüquqlu tərəf olur. Ümumi olaraq vətəndaşlarımız bilməlidirlər ki, Azərbaycan Respublikasının daşınmaz əmlak reystrinin qeydiyyatı haqqında qanunu var və həmin qanuna əsasən vətəndaşlar onlara məxsus olan əmlakları mütləq qaydada rəsmi dövlət reystrindən qeydiyyatdan keçirməlidirlər. Dövlət Reystrində qeydiyyat olunan zaman fərdi yaşayış evlərinin qeydiyyatı üçün tələb olunan ilkin sənədlərdən biri də, torpaqla əlaqəli sənəddir. Əgər bir vaxtlar icra hakimiyyətinin müvafiq sərəncamı ilə almış olduğu torpaq sonradan bələdiyyənin hesabına keçməsi ilə əlaqədar vətəndaşın məlumatı yoxdursa, ona belə bildirişin gəlməsi də əsassızdır. Bələdiyyələr ilkin olaraq öz üzərlərinə düşən işlərlə məşğul olsalar, daha yaxşı olar. Belə ki, heç bir məlumatı olmayan vətəndaşa mütləq qaydada izah verməlidirlər. Vətəndaş lazımi qaydada məlumatlandırıldıqdan sonra sənədlərin yenidən təqdim olunmasını istəyə bilərlər. Amma bu sənədlərin tələb olunması da əsassızdır, çünki bələdiyyələr yerli özünü idarəetmə orqanlarıdır. Onlar hüquqi yardımlaşma ilə ilə bağlı müvafiq dövlət qurumlarına müraciət edə bilərlər və həmin ərazidə qeydiyyatı aparılmış fərdi yaşayış evlərinin mülkiyyətçiləri barədə dolğun məlumat almaqla, onların qısa müddətdə qeydiyyatlarını apara bilərlər. 

Bələdiyyələrin bu şəkildə davranışı sadəcə istifadəyə verilmiş torpaqların vergilərinin yığılmasından ibarətdir. Bələdiyyə indiki halda öz vəzifəsi ancaq vergilərin yığılmasında görür. Lakin bu uğurlu bir yol deyil, bələdiyyələr özlərində islahatlar aparmalıdırlar. İlkin olaraq vətəndaşa xidməti formalaşdırıb, ardından vətəndaşlardan tələb edə bilərlər".