Mətbuatda Hollandiyada bir neçə seks-şopa sahib olan Əbdüləziz Auraxın Səudiyyə Ərəbistanı ruhanilərinin razılığını alaraq Məkkədə "Halal seks mağazası” açacağı ilə bağlı xəbərlər yayılıb. Bildirilib ki, "Al Asira” adını alacaq seks-şop dini liderin, İslam dininin icazə verdiyi məhsulları – rezin qoruyucuları, 18 adda müxtəlif cinsi oyuncaqları satışa çıxaracaq. Əbdüləziz Aurax seks-şopların kişi və qadınlar arasında seksual münasibətlərin yaxşılaşmasına xidmət edəcəyini deyib.
 
Bəs görəsən ilahiyyatçılar bu barədə nə düşünür? İslam dinin beşiyi olan Məkkədə belə bir mağazanını açılması nəyə əsaslanır? Və nə dərəcədə şəriətə uyğundur?
 
 İlahiyyatçı Bəhriz Camal Analitik.az-a bildirdi ki, bu addım İslamın heç bir qayda-qanununa əsaslanmır: "Bunlar halal seks mağazası deyəndə nəyi nəzərdə tuturlar? Əgər biz cinsi əlaqənin halal və haramını ayırd etsək, bunu şəriət də deyir ki, zina haramdır. İslam dini bunu qadağan edir. Amma dini qaynaqlarımızda qadın-kişi münasibətləri barəsində kifayət qədər məlumatlar var. Hollandiyanın da necə ölkə olduğu bəllidir. Burada olan təfəkkür tərzinin İslam ölkələrinə daşınması artıq müsəlmanlar üçün faciədir. Başa düşə bilmirəm ki, cinsi oyuncaqlar deyəndə nə nəzərdə tutula bilər axı? Belə bir şeylər hansı hədisdə, hansı şəriət qanununda var? Səudiyyənin dini rəhbərləri belə bir mağazanın açılmasına necə  icazə verirlər?!.”

 B. Camal qeyd edib ki, İslamın yeganə icazəli bildiyi cinsi münasibət tərəflər arasında əqd bağlanaraq evlilik müddətində olan münasibətlərdir. Bundan başqa həyata keçirilən qeyri cinsi münasibətlərin hamısı isə şəriət baxımından haramdır: "İndi bunlar cinsi oyuncaqlar deyəndə insanların həzz alması üçün vasitələr gətirib satışa çıxaracaqlar? Bunun özü aşkar şəkildə dini qaynaqlarda haram buyurulur. Hansı vasitələri satacaqlar ki, buna da halal donu geyindirmək istəyirlər? Təəssüflər olsun ki, peyğəmbərin seçilmiş səhabələrinin qanı-canı bahasına Məkkəni müşriklərdən təmizləyib müsəalmanların qibləsinə çevirdiyi şəhəri bu gün özlərinə "Allah Evi”nin xadimi deyən şəxslər tərəfindən cahil ərəb düşüncəsinə qaytarıldığının bir daha şahidi oluruq. Səudiyyə Ərəbistanı hökuməti yavaş-yavaş Məkkə və Mədinə şəhərini keçmiş cahiliyyə dönəminə qaytarmaq istəyir.”
 
 
İlahiyyat üzrə fəlsəfə doktoru Əkrəm Həsənov isə fərqli düşünür. Ə. Həsənov deyir ki, bu cür xəbərlərin qabardılmasında maraqlı olan Qərb mediasıdır. Çünki, Qərb mediasının çox hissəsi yəhudilər və xristianlar tərəfindən idarə olunur. Onlar üçün müsəlmanların müqəddəs yerlərinə dil uzatmaq, açıq-saçıqlıq kimi kampaniyalar aparmaq adi haldır. Bu cür xəbərlərin yayılmasında maraqlı olanlar da imanı az insanlardır: "Çünki bildiyimiz kimi Məkkə islam dininin ən mübarək, müqədəs yerlərindən biridir. Allahın peyğəmbəri Məkkədə, Kəbədə qılınan namazı başqa yerlərdə qılınan namazdan on min dəfə, yüz min dəfə üstün tutub. Məkkədə ümumiyyətlə, haram hesab edilən və açıq-saçıqlığı ifadə edən heç bir məhsullar satılmır. Ancaq normal haldır ki, mağazalarda kişilərə və qadınlara məxsus alt paltarları satılır ki, burada da heç bir haramlıq yoxdur. Çünki, bu cür paltarların istifadəsi bütün insanlar kimi müsəlmanlara da zəruridir. Belə paltarların satışı da dinimizə görə icazəli hesab edilir. Məkkə ilk insan, ilk peyğəmbər Adəm əleyhissalamın vaxtından mübarək, müqəddəs hesab edilir. Sonra İbrahim peyğəmbərin və oğlu İsmayıl peyğəmbərin vaxtında Məkkə yenidən inşa olunmuş,  ibadət, təvaf və digər Həcc şərtləri orada yerinə yetirilmişdir. Tarixdə bir neçə dəfə Məkkəni yıxmaq istəyən hökmdarlar olmuş və özləri yerlə yeksan olmuşlar.”
Onun sözlərinə görə, müasir dövrdə Məkkədə mağazalarda haram ərzaq, qida növlərinin satışı qadağandır. Bizim ölkəmizdə satışı və istifadəsi adi hesab edilən siqaret belə dinimizə görə haramdır və Məkkə mağazalarında satışı qadağan edilib: "Başqa ölkələrdən gedənlər özləri ilə haram qida olan siqareti alıb aparırlar ki, bunun da məsuliyyəti Məkkə əhalisində yox, ora gedən müxtəlif inanclara, əməllərə sahib insanların özlərindədir. Qeyd olunan belə bir mağazanın istifadəsi isə yəqin ki, əsassız xəbərdir.”
R.ZEYNALLI/Analitik.az