Zöhrab Şixəliyev: "Kimdən xoşları gəlmirsə, vurmaq istəyirlərsə, bu üsullarla vururlar”

Bu günlərdə mətbuatda "ASAN” xidmətin Sumqayıt bölməsinin rəisinin sələfi olması haqda xəbərlər yayılıb. Bu məlumatla bağlı Sumqayıtda sələfilərin lideri kimi tanınan Zöhrab Şixəliyev Xeberle.com-a açıqlama verib. O, Vüqar Cəfərovu, yaxud ona bu adı qoşanları tənqid edib, bildirib ki, yerindən duran özünü sələfi sayır, yaxud da kimdən xoşları gəlmirsə, vurmaq istəyirlərsə, bu üsullarla vururlar:

"Onu tanımıram, bilmirəm kimdir, ancaq biz sələfilərdən deyil. Kimlərinsə sələfləri ola bilərlər, ancaq Peyğəmbərin (səllallahu əleyhi və ali səllam) yolunu gedən sələflər həmişə zahiri görünüşü, əxlaqı, səbri, hikməti, məscidlərə bağlılığı, elm əhlindən, alimlərdən faydalanmağıyla seçiliblər. Dövlətini Allah üçün sevməsi, şirkdən və bidətlərdən hikmətlə təmizləmələri ilə fərqləniblər. Sələf camaatını son zamanlar demək olar ki, bəzi aidiyyəti qurumlar çox yaxşı tanıyırlar.

Vallahi ki, biz sələflərə o adam kömək etməyib, biz mətbuatdan eşidəndə çaşıb qaldıq ki, yerindən duran özünü sələfi sayır. Ya da kimdən xoşları gəlmirsə, vurmaq istəyirlərsə, bu üsullarla vururlar. Mən onu heç Ceyranbatanda görməmişəm. Ola bilər namaz qılan olsun”, - deyə Z.Şıxəliyev bildirib.

O əlavə edib ki, sələf - saqqalı, misvaqı, ətiri, topuqdan yuxarı geyimi, məscidə bağlılığı, səbri, əxlaqı və lazım gələrsə, öz vətənini Allah üçün qorumağa hazır olmağa çalışan camaatdır.

Xeberle.com