Bu gün Bakı Ağır Cinayətlər Məhkəməsində dələduzluqda təqsirləndirilən Vüqar Rəhimovun cinayət iş üzrə məhkəmə prosesi davam etdirilib.
Xeberle.com-un APA-ya istinadən xəbərinə görə, hakim Ramella Allahverdiyevanın sədrliyi ilə keçirilən prosesdə zərərçəkmiş şəxs qismində sabiq deputat, "Sumqayıt-Çörək” ASC-nin rəhbəri Tofiq Hüseynov ifadə verib. O bildirib ki, V. Rəhimov ona məxsus "TERM" tikinti şirkətində mühasib işləyərkən, şirkətə məxsus 400 min manata yaxın vəsaiti ələ keçirib: "Tikinti işləri ilə bağlı vəsait çatmadığına görə, 877 min manat məbləğində "Rabitəbank" ASC-dən kredit götürdük. Kredit xətti açılandan sonra, Vüqar Rəhimov götürülən krediti təyinatı üzrə xərcləməyib, pulu mənimsəyib".
Təqsirləndirilən V. Rəhimov isə günahsız olduğunu və kreditin ona verilmədiyini, bu məbləği T. Hüseynovun yaxınlarının mənimsədiyini bildirib: "Ancaq məni bu işdə günahlandırırlar. Pulu baş mühasib, direktor və başqaları ələ keçirib".
Proses mayın 17-də davam etdiriləcək.
Qeyd edək ki, V. Rəhimov zərərçəkmiş Tofiq Hüseynova məxsus "TERM" tikinti şirkətində mühasib vəzifəsində çalışıb. İttihama görə, o, şirkətə məxsus 877 min manat pulu dələduzluq yolu ilə ələ keçirib. Həmin məbləğin 537 min manatı ödənilib.
Xəbərdən istifadə edərkən istinad etmək vacibdir.
