Daxili İşlər Nazirliyinin (DİN) Baş Mühafizə İdarəsinin canlı qüvvə və texniki vasitələri ilə mühafizə olunan obyektlərin təhlükəsizliyi fasiləsiz etibarlı şəkildə qorunur.
DİN-in mətbuat xidmətindən Xeberle.com-a bildiriblər ki, bunu sübut edən növbəti hadisə Abşeron rayonu ərazisində qeydə alınıb.
Novxanı qəsəbəsində xüsusi texniki vasitələrlə qorunan bağ evlərindən birindən Baş Mühafizə İdarəsinin Kompüterləşdirilmiş Mərkəzi Mühafizə Məntəqəsinə "Həyəcan” siqnalı daxil olub. Abşeron Rayon Mühafizə İdarəsinin əməkdaşları dərhal hadisəyə operativ reaksiya göstəriblər.
Əraziyə gələn polis əməkdaşları bağ evinə baxış keçirən zaman bir nəfərin evin naqillərini oğurlamasının şahidi olublar. Polisin gəldiyini görən həmin şəxs evin hasarından tullanaraq qaçmaq istəyən zaman mühafizə polisi əməkdaşlarının çevikliyi sayəsində saxlanılıb. Ərazi üzrə polis bölməsinə təhvil verilən həmin şəxsin paytaxt sakini Ramin Rzayev olduğu müəyyən edilib. Araşdırma zamanı onun əvvəllər də dəfələrlə Cinayət Məcəlləsinin müxtəlif maddələri ilə məhkum edildiyi məlum olub. O, ifadəsində oğurluq etdiyi üçün mühafizə polisi tərəfindən saxlanıldığını bildirib.
Bağ evinin sahibi bir müddət əvvəl mənzilindən bəzi əşyaların oğurlandığını müşahidə edib. Buna görə o, mühafizə polisinin xüsusi texniki vasitələrinin köməyi ilə evinin 24 saat ərzində etibarlı şəkildə qorunması üçün Abşeron Rayon Mühafizə İdarəsi ilə müqavilə imzalayıb. Yalnız bundan sonra evdən silsilə oğurluqlar edən şəxsin saxlanılması mümkün olub.
Faktla bağlı araşdırmalar davam etdirilir. Həmin şəxsin qanunsuz əməllərindən zərər çəkən başqa vətəndaşlar varsa, ərazi polis orqanlarına, habelə nazirliyin 102 Xidməti - Zəng Mərkəzinə məlumat verə bilərlər.
DİN-in Baş Mühafizə İdarəsi bir daha əhalini əmin edir ki, mühafizə polisinə etibar edən fiziki və hüquqi şəxslərə məxsus bütün mülkiyyət formalarının mühafizəsi etibarlı şəkildə və yüksək peşəkarlıqla həyata keçirilir.
Xəbərdən istifadə edərkən istinad etmək vacibdir.
