Sumqayıt Dövlət Universitetində (SDU) ümummilli lider Heydər Əliyevin anadan olmasının 93-cü ildönümünə həsr edilən, magistrantların XVI Respublika elmi konfransı keçirilib.

Universitetin rektoru, professor Elxan Hüseynov ulu öndər Heydər Əliyevin Azərbaycan xalqı qarşısındakı xidmətlərindən, dövlətçiliyimizin qurulması və möhkəmləndirilməsi istiqamətindəki əvəzsiz rolundan danışıb. Rektor vurğulayıb ki, tələbələrimiz müxtəlif ölkələrdə yaradıcı ezamiyyətlərdə olur, respublika səviyyəli və beynəlxalq konfranslarda iştirak edirlər. Bu gün Təhsil Nazirliyi ölkəmizdə ali təhsilin inkişafı istiqamətində mühüm işlər görür, elm və təhsilin inteqrasiyasına nail olunması, ali təhsil müəssisələrində aparılan elmi tədqiqatların proritetlərinin müəyyənləşdirilməsi istiqamətində zəruri tədbirlər həyata keçirərək uğurlu layihələrə imza atır.

Nazirliyinin təşəbbüsü ilə SDU hər il magistrantların və gənc tədqiqatçıların respublika elmi konfransına ev sahibliyi etməklə magistrantlarda elmə, elmi tədqiqatlara olan marağı daha da artırır. Artıq ənənə halını alan bu konfrans da həmin siyasətin tərkib hissəsidir.

Bildirilib ki, konfransa respublikamızın 17 ali təhsil müəssisəsindən 960 məruzə daxil olub.

Azərbaycan Texniki Universitetinin elmi işlər üzrə prorektoru İlham Pirməmmədov belə konfransların keçirilməsinin gənc tədqiqatçıların elmi potensialının üzə çıxarılmasında böyük rol oynadığını və bu sahədə gənclərin üzərinə çox mühüm vəzifələrin düşdüyünü bildirib. Qeyd edilib ki, elm, təhsil xalqın rifahının yüksəldilməsinə, dövlətimizin gələcək nailiyyətlərinin artmasına xidmət edir. İ.Pirməmmədov SDU-nun bu təşəbbüsünü yüksək dəyərləndirib, yaradıcı gənclərə uğurlar arzulayıb.

Odlar Yurdu Universitetinin elmi işlər üzrə prorektoru Tərlan Abdullayev ənənəvi olaraq hər il SDU-da keçirilən konfransı müsbət dəyərləndirib. O, Ulu Öndərin gənclər siyasətindən, xalqımızın malik olduğu milli mənəvi dəyərlər əsasında müstəqillik və dövlətçiliyin qorunması uğrunda mübariz ruhlu gənc nəslin yetişdirilməsindən danışıb. Magistranlara və gənc tədqiqatçılara bir sıra dəyərli tövsiyələr verib.

SDU-nun doktorantura və magistratura şöbəsinin müdiri, dosent Ramiz Hüseynov bildirib ki, konfransa təqdim olunan məruzələr olduqca aktual məsələlərə həsr olunub. O, konfransın gedişatı barədə məlumat verərək diqqətə çatdırıb ki, tədbirdə mütəşəkkil iştirak edən ali təhsil müəssisələri magistrantlarının tezisləri bu il də kitab halında çap olunaraq iştirakçılara təqdim edilib.

Sonra konfransda müxtəlif ali məktəblərin magistrantları çıxış edərək onların tədqiqatçılıq bacarıqlarının inkişafına, elmi nailiyyətlərinin müzakirəsinə kömək göstərən belə konfransların keçirilməsinin təqdirəlayiq olduğunu söyləyiblər.

İki gün davam edən konfransın bölmə iclaslarında məruzələr dinlənilib.

Mayın 20-də konfransın bağlanış tədbirində fərqlənən tələbələrə diplomlar təqdim edilib.
Azərtac