Sumqayıtda şəhər 12 nömrəli tam orta məktəbdə Azərbaycan Respublikasının Prezidenti yanında Bilik Fondunun xətti ilə "İl boyu bilik” proqramı çərçivəsində mühazirə təşkil olunub. Xeberle.com-a verilən məlumata görə, Bilik Fondunun mühazirəçisi, Sumqayıt Şəhər Təhsil Şöbəsinin metodisti Əlhəddin Paşayev "Heydər Əliyev və Azərbaycan” mövzusunda mühazirə ilə çıxış edib. Tədbirdə məktəbin direktoru Mətanət Abdullayeva, direktor müavinləri Sevinc Məmmədquliyeva və Arzu Qasımova, Uşaq Birliyi Təşkilatının rəhbəri Gülnar Əliyeva iştirak edib, həmçinin 9-11-ci sinif şagirdləri və bəzi müəllimlərin iştirakı təmin edilib.
Mühazirəçi Əlhəddin Paşayev Bilik Fondunun fəaliyyəti, həyata keçirdiyi layihələr barədə ətraflı məlumat verərək bildirib ki, fondun əsas məqsədi Respublika əhalisini maarifləndirmək, dövlətin daxili və xarici siyasətini, ictimai-siyasi və sosial-iqtisadi proseslərin mahiyyətini ictimaiyyətə çatdırmaq; əhalinin elmi-texniki, siyasi-ictimai, sosial-iqtisadi, ekoloji və humanitar biliklərini artırmaq məqsədilə təşkilati və təbliğat xarakterli tədbirlər həyata keçirməkdir. Bilik Fondu həyata keçirdiyi layihələrlə Azərbaycan Respublikasının əhalisinə qloballaşma şəraitində cərəyan edən proseslər haqqında dolğun biliklər çatdırmaq, gənclərin bilik və bacarıqlarının, peşəkarlıq səviyyələrinin və dünyagörüşünün inkişafına dəstək göstərməkdədir. O, layihələrdə təhsil işçilərini, müəllimləri yaxından iştirak etməyə dəvət edib. Sonra mühazirəçi tərəfindən Bilik Fondunun aylıq bülletenləri nümayiş etdirilib; Fondun həyata keçirilən işlər, uğurlu nəticələr barəsində geniş məlumat verilib.
Daha sonra Əlhəddin Paşayev öz mühazirəsində Ümummilli Lider Heydər Əliyevin Azərbaycanın gələcək uğurlu inkişafı üçün seçdiyi dəqiq ideoloji hədəflərdən, onun öz uzaqgörən, müdrik siyasəti ilə əsrlər boyu formalaşan çoxmədəniyyətlilik, multikulturalizm ənənəsini inkişaf etdirərək onu keyfiyyətcə yeni mərhələyə qaldırmasından bəhs edib; Ulu Öndərin dünyanın nadir, unikal, seçilən siyasət adamı olduğunu qeyd edib. Tədbirin təşkilatçılıq işinin yüksək səviyyədə baş tutması sayəsində mühazirəçi öz çıxışını günün tələbinə uyğun səviyyədə qura bilib və "Heydər Əliyev və Azərbaycan” mövzusuna dair ayrı-ayrı məqamları dinləyicilərə çatdırıb. Mühazirə, müəllimlər və şagirdlər tərəfindən diqqətlə dinlənilib; tədbirdə əməkdaşlığın perspektivliyi barədə fikir mübadiləsi aparılıb, sonda dinləyiciləri maraqlandıran çoxsaylı suallara mühazirəçi tərəfindən aydınlıq gətirilərək cavablandırılıb.
Məktəbin direktoru Mətanət Abdullayeva rəhbərlik etdiyi təhsil ocağının müəllim və şagird kontingentinin Bilik Fondu ilə birgə səmərəli layihələr gerçəkləşdirə biləcəklərinə əmin olduğunu vurğulayıb. Həmçinin müəllim və şagirdlərin Bilik Fondunun layihələrində iştirak etməyə hazır olduqlarını qeyd ediblər.
Tədbir iştirakçıları Bilik Fondunun maarifçilik fəaliyyətini yüksək qiymətləndirməklə yanaşı, belə mühazirələrin tez-tez təşkil olunmasının tərəfdarı olduqlarını bildiriblər.

Xəbərdən istifadə edərkən istinad etmək vacibdir.