Ali təhsil müəssisələrinin bakalavriat səviyyəsi üçün 6 sınaq imtahanı keçiriləcək.

Bu gündən Azərbaycanda ali məktəblərə qəbul imtahanlarında iştirak edəcək abituriyentlərə kömək məqsədilə keçiriləcək sınaq imtahanlarına yazılış başlayıb.

Tələbə Qəbulu üzrə Dövlət Komissiyasından (TQDK) Oxu.Az-a verilən xəbərə görə, aprelin 6-da və 13-də keçiriləcək sınaq imtahanlarına qeydiyyat martın 27-dən etibarən aparılır.

Sınaq imtahanlarına yazılmaq üçün ödəmə kartını abituriyentlər bütün mobil operatorlardan 7735 nömrəsinə SMS göndərməklə əldə edə bilərlər.

2014-cü ildə ali təhsil müəssisələrinin bakalavriat səviyyəsi üçün 6 sınaq imtahanı (4-ü yeni, 2-si təkrar) keçiriləcək. İmtahanlar 6, 13, 20, 27 aprel, 25 may və 1 iyun tarixlərində baş tutacaq.

Qeyd edək ki, abituriyentlər sınaq imtahanlarına qeydiyyatla bağlı ilkin məlumatları komissiyanın “facebook” səhifəsindən öyrənə biləcəklər.