“2013-cü ildə dövlət proqramı ilə 787 tələbə xaricdə təhsil almağa göndərilib.Nazirlik dövlət proqramı ilə xaricdə təhsil almaq istəyənlərə say məhdudiyyəti qoymur”. 

“Qafqazinfo” xəbər verir ki, bunu jurnalistlərə açıqlamasında Təhsil naziri Mikayıl Cabbarov dövlət proqramı ilə xaricdə təhsildən danışarkən deyib. O vurğulayıb ki, əsas diqqət tələbənin akademik göstəricilərinə yönəlib: 

“Elə məqsədimiz də yoxdur ki, keçən ilkindən daha çox tələbə göndərək. Əsas meyar təhsilin keyfiyyəti, ixtisasın prioriteti, təhsil alacağı yerin nüfuzu, həmin ixtisasa olan tələbat və tələbənin akademik göstəriciləri və keyfiyyətləridir”. 

Nazir buraxılış imtahanları ilə bağlı da jurnalistlərin sualını cavablandırıb. O bildirib ki, buraxılış imtahanlarında attestatların verilməsi qanunvericilik çərçivəsində həyata keçirilir: “Ötən il ilk dəfə tətbiq olunan qayda hüquqi-normativ aktlara əsasən tənzimlənib və qüvvəsindədir. Buraxılış imtahanlarında iştirak edən şagirdlər bu il də ötən ilki kimi imtahan verəcəklər və attestat əldə edəcəklər”.

Nazir eyni zamanda dərs ilinin müddətinin uzadılması ilə bağlı sualı da cavablandırıb. O bildirib ki, dərslər sentyabrın 15-də başlayacaq:

"Dərslərin bitmə müddətini isə deyə bilmərəm. Hələ ki, bir neçə variantda müzakirələr gedir"