Səfərbərlik və Hərbi Xidmətə Çağırış üzrə Dövlət Xidmətinin yaranmasının 7-ci ildönümü münasibətilə, yeniyetmə və gənclərin vətənpərvərlik tərbiyəsi işinin təşkili və idmanın hərbi tətbiqi növlərinə həvəsləndirilməsi məqsədi ilə "Əsgər olmağa hazıram” yarışı keçirilib. Mübarizəyə Gənclərin vətənpərvərlik tərbiyəsində müstəsna əhəmiyyəti olan, Əsasnaməsi 7 nazirlik və təşkilat tərəfindən təsdiq olunmuş «Şahin» hərbi-idman oyunlarının 2018-ci ildə zona qalibi olmuş şəhər komandalarının tərkibindən 3 nəfər (yalnız oğlanlar olmaqla, komandanın kapitanı və 2 nəfər üzvü) yarışa qatılıb. Sumqayıt şəhərini, eləcə də şimal zonasını (Abşeron, Qubadlı, Xızı, Siyəzən, Şabran, Xaçmaz, Quba, Qusar rayonları) Sumqayıt şəhəri Təbiət Elmləri Təmayüllü Gimnaziyanın 2018-ci ilin Respublika çempionu olmuş "Şahinlər” komandasının üzvləri Fərid Nəsirli, Məhəmməd Əhmədov, Məhəmməd Cavadov təmsil ediblər.
Yarışda "gənc əsgərlər” sıra hazırlığı, atəş hazırlığı, avtomatın normativ üzrə sökülüb yığılması, fiziki hazırlıq üzrə: 100 m məsafəyə qaçış, turnikdə dartınma, arxası üstə uzanmış vəziyyətdə gövdənin qaldırılması, uzanaraq qaydada qolların bükülüb - açılması mərhələləri üzrə güclərini sınayıblar. Gərgin mübarizədən sonra Sumqayıt şəhərini təmsil edən Təbiət Elmləri Təmayüllü Gimnaziyanın "Şahinlər” kollektivi ən yüksək nəticə göstərərək 8 şəhərin komandası sırasında I yerə layiq görülüb. Komanda bu qələbəsi ilə 2018-ci ildəki uğurunu bir daha təsdiqləyib. Qeyd edək ki, şagirdləri yarışa məktəbin Çağırışaqədərki hazırlıq müəllimi, ehtiyatda olan mayor, Prezident təqaüdçüsü, Prezident mükafatçısı Eltəkin Qocayev hazırlamışdır.
Xəbərdən istifadə edərkən istinad etmək vacibdir.
